شال: پولیس ءَ اھسان شاه ءِ مات آرپه شاه گوں آئی کسان سالیں جنک ءِ ھمرائی ءَ چه شال پریس کلب ءِ دیم ءَ برجاهیں زھرشانی نندانک ءَ دزگیر کرتگ اَنت۔
بنشون ءِ رد ءَ پاکستانی پوج ءِ دست ءَ کشگ بیتگیں اھسان شاه ءِ مات آرپہ شاه که گوستگیں دو ھپتگ اِنت په وتی زھگ ءِ ناھکیں کوش ءِ بگیری ءَ شال پریس کلب ءِ دیم ءَ زھرشانی ءَ نشتگ گوستگیں روچ ءَ پولیس ءَ چه زھرشانی نندانک ءَ گوں آئی کسان سالیں جنک ءِ ھمرائی ءَ دزگیر کرتگ ءُ آزار داتگ اَنت۔
آرپه شاه ءَ مرچی چه یل بوگ ءَ پد ماں تامربندے ءَ گوشتگ که من ھمے واستا دزگیر کنگ بیتگ آں که من وتی زھگ ءِ کشندھانی سزا دیگ ءِ لوٹ کرتگ اَت ، من ءَ چه ریاست ءِ نیمگ ءَ باز رند ءَ ھمے گوشگ بیتگ که زھرشانی ءَ هلاس به کن ، رسانکدر ءَ ھبر مکن ءُ بے توار ببو۔
آئی ءَ دیمتر ءَ گوشتگ که شال پولیس ءِ سروک ءَ گوستگیں روچ ءَ دزگیری ءَ پیش من ءَ بیھار داتگ که وتی زھرشانی ءَ ھلاس کن اگاں ناں آوار جنگ ءُ زوربیگواه کنگ بہ ئے۔
بلوچ یکجھتی کمیٹی ( بی وائی سی ) آرپه شاه ءِ دزگیری گوں ترندیں دانکاں اِیر جتگ ءُ گوشتگ که په ایمنیں زھرشانیانی ھلاس کنگ ءَ چه ریاست ءِ نیمگ ءَ زور ءِ کارمرز کنگ ءَ نه منّ ایں ، آرپه شاه ءَ انساپ دیگ ءِ جاه ءَ گوں آئی زوراکی ءِ نشانگ کنگ بوگ ءَ اِنت۔
