کیچ: تمپ ءَ زورگریں پاکستانی لشکر ءَ دو براتاں ھوار سے ورنا آوار جتگ ءُ بیگواہ کرتگ۔
اھوالکار ءِ رد ءَ زور بیگواہ کنگ بوتگیں ورنایانی نام مھسن ء ابدالسمد، آدل ء ابدالسمد ءُ سھیل ء گلام رسول اِنت، زورگریں پاکستانی لشکر ءَ مرچی سھب ءَ چہ تمپ ءِ میتگ کسانو ءَ آوار جتگ ءُبیگواہ کرتگ اَنت۔
زوربیگواھیں مھسن ءِ باروا گوشگ بوگ ءَ اِنت کہ یک رندے پیش ءَ ھم آوار جنگ ءُ بیگواہ کنگ بوتگ، نو ماہ ءِ زوریں بیگواھی ءَ پد آجو بوتگ۔
ایشانی زوریں بیگواھی ءِ گپ بلوچ راجی زرمبشت ( بی این ایم ) ءِ مردمی ھکانی ادارہ پانک ءَ راست کرتگ ءُ ماں چاگردی رسانکدر ایکس ءَ آیانی اکس شنگ کرتگ اَنت ءُ آجوئی ءِ لوٹ کرتگ۔
