اسلام آباد ءَ بی وائی سی ءِ سروک ءُ زوربیگواھیں مردمانی کھولانی نیمگ ءَ زھرشانی سیزدھمی روچ ءَ برجاہ بیتگ۔ چہ زھرشانی جاہ ءَ راجی مچی ءِ درگت ءَ دیوانے برجم دارگ بیتگ۔
آیاں تران کرتگ ءُ گوشتگ کہ راجی مچی ءِ وھد ءَ ریاست ءَ وتی سرجمیں زور پہ راجی مچی ءِ دارگ ءَ کارمرز کرتگ اَت کہ من کجام ھم وڑ ءَ راجی مچی ءَ بے سوب بہ کناں بلے اود ءَ ریاست ءِ جند بے سوب بوت راجی مچی شریں وڑے ءَ سوبمند بوت۔ مارا راجی مچی بس پہ یک روچے ءَ گوادر ءَ کنگی بیتگ بلے آ سرجمیں بلوچستان ءَ چہ ھپتگے ءَ گیش برجاہ بیتگ۔
آئی ءَ گوشتگ کہ پہ راجی مچی ءَ گوادر ءَ سیزدہ، چاردہ روچ ءَ نندگ ءَ چہ رند تربت، پنجگور، گریشگ، نوشکے ءُ کلات ءَ ھم دارگ بیتگ۔ بی وائی سی ءِ مول ھمے بیتگ کہ بلوچ چکچینی ءُ لٹ ءُ پول ءِ بگیری ءَ سرجمیں راج ءَ یکجاہ بہ کن ایں۔ ما وتی راجی جیڑہءَ وتی سرجمیں راج ءُ میان استمان ءِ دیم ءَ ایر بہ کن ایں۔ اگاں ما وتی سرجمیں راج ءَ یکجاہ بہ کن ایں گڑا مئے جیڑہ گیش ءُ گیوار بنت۔
آئی ءَ گوشتگ کہ بلوچستان ءِ تہ ءَ چونیں ھم مچی یا زھرشانی یے بہ بیت گڑا ریاست آئی بگیری ءَ وتی سرجمیں زور ءَ چکاس ایت۔ بلوچ ءَ چہ بنداتی روچ ءَ گھگیری کرتگ ءُ ریاستءَ را پیش داشتگ کہ من ھر پیم ءَ وتی راجی جنز ءَ دیم ءَ بر ایں ءُ وتی جنز ءَ سوبیں کن ایں، تئی تیر ءُ توپنگ ھچ وڑ ءَ مارا داشت نہ کن اَنت۔
آئی ءَ گوشتگ کہ ھمے راجی مچی ءِ میان ءَ چار سنگت شھید بیتگ ءُ دگہ باز داں مرچی ھم نادراہ اِنت بلے بلوچ چہ وتی جھد ءَ مرچی ھم پد نہ کنز اتگ ءُ گوں جھد ءَ ھوار اِنت۔ ھما مردم کہ ھمے میان ءَ ٹپی بیتگ اَنت گڑا مرچی کج ءَ زھرشانی یے بہ بیت آ رو اَنت ءُ ھوار بنت۔ اے پہ ریاست ءَ یک مزنیں مسالے کہ تو ھنچو زوراکی کن ئے ءُ مئے دارگ ءِ جھد ءَ کن ئے گڑا ما ھنچو تئی بگیری ءَ گھگیری کن ایں۔
