پانک ءِ ماھی رپورٹ ءِ رد ءَ ، بلوچستان ءَ زور بیگواھی ، در آمیدگس ءُ ریاستی کوش ءِ ویل یکشل ءَ برجاہ اَنت ، بلکیں ایشانی تہ ءَ بے تاھیر کنوکیں کچے ءَ گیشی اتکگ۔
بلوچ نیشنل موومنٹ ( بی این ایم ) ءِ مردمی ھکانی تْرامگیج پانک ءِ رپورٹ ءِ رد ءَ مردمی ھکانی تْرام اتگ ءُ پہ زانت کرتگیں کارروائیاں بلوچستان ءِ 18 ھنکیناں مردم نشانگ کنگ بیتگ اَنت۔ چہ پانک ءِ نیمگ ءَ ھمک ویل ٹپاسگ ءَ پد اےرپورٹ ءِ بھر کنگ بیتگ۔
اپریل 2025 ءَ 151 مردم پاکستانی لشکرءُ گوں آئی ءِ بندوکاں تْرامگیجاں زور بیگواہ کرتگ۔ چہ درساں گیش کیچ ھنکین ءَ 53 کس زور بیگواہ کنگ بیتگ ، چہ ایشی ءَ پد چہ گوادر ءَ 19 ، ءُ چہ شال ءَ 18 کس ءِ زور بیگواھی ءِ ھال رس اتگ۔چہ دگہ ھنکیناں ھم مردمی ھکانی بگیری برجاہ اِنت چہ آیاں ڈیرہ بگٹی ءَ 13 ، پنجگور ءَ 8 ، آواران ءَ 7 ، سیبی ءَ 6 ، بارکان ءَ 5 ، کراچی ءُ مستونگ ءَ 4-4 ، لسبیلہ ، موسی کیل ، چاگے ،ھزدار ، کلات ءَ 2-2 ، واشک ، ھاران ، سوارب ءُ نوشکے ءَ یک یک مردمے زور بیگواہ کنگ بیتگ۔ اے کچ ءُ شمار ھمے درانگاز اَنت کہ سرجمیں بلوچستان مردم یک پیم ءَ زوراکیانی نشانگ کنگ بیگ ءَ اَنت۔
پانک ءِ رد ءَ زور بیگواھیں مردم چہ آیانی کھول ءُ آ دگہ جھان ءَ سندگ بہ اَنت ، باز بر ءَ زور بیگواھیں مردم درآمیدگسی کشگ بہ اَنت۔ اپریل ءِ ماہ ءَ 50 مردم چہ پاکستانی لشکر ءِ آزارجاھاں یلہ کنگ بیتگ۔ 23 کس درآمیدگسی کشگ بیتگ ، اے کوش ءُ زور بیگواھیانی تہ ءَ پاکستانی لشکر تچکے ءَ گون اِنت۔ باز مردم ناراھی دزگیری ءَ پد چہ آزاراں ٹپی ھم بیتگ ، بلے داں اے وھدی زانگ نہ بیتگ کہ کے ءُ چنت مردم اَنت۔
رپورٹ ءَ زور بیگواھی ءِ میان ءَ دزگیریں کوشانی سر ءَ ھم گپ جنگ بیتگ۔ اپریل 2025 ءَ بلوچستان ءَ درآمیدگسی کوش ءِ بازیں ویل پیتبند بیتگ چہ ایشاں باز زور بیگواھی ءَ پد کشگ بیتگ۔ابدالمالک ، 11 اکتوبر 2024 ءَ چہ تربت ( کیچ ) ءَ زور بیگواہ کنگ بیتگ ءُ 4 اپریل 2025ءَ آئی ءِ کنٹ چہ باگبانہ ، ھزدار ءَ دست کپتگ۔شاہ نوار ءُ زھور اھمد 5 اپریل ءَ چہ مشکے ، آواران ءَ آوار جنگ ءَ پد دزگیری جاہ ءَ کشگ بیتگ اَنت ، ھبیب مارچ 2025 ءَ آوار جنگ بیتگ ءُ ھمیشاں پجیگ ءَ 5 اپریل کشگ ءُ چگل دیگ بیتگ۔ ساھل ، 12 سالی زھگے ، اپریل ءِ ماہ ءَ چہ پسنی ، گوادر ءَ آوار جنگ بیتگ ، آئی ءِ کنٹ شاہ جان ھوٹل ، پسنی ءِ پشت ءَ دست کپتگ۔مھراب ءُ ھان مھمد 6 اپریل ءَ آوار جنگ ءَ پد کشگ بیتگ اَنت۔ ھک نواز ، شیرو ءُ گل زمان بزدار 5 اپریل ءَ چہ بارکان ءَ زور بیگواہ کنگ ءَ پد دروگیں میڑے ءَ کشگ بیتگ اَنت۔ بھادر شپیُ آئی ءِ سئے ناکو زتک 7 اپریل ءَ ماں وشبود ، پنجگور ءَ مھترھندی مردم کشیں رمباں نشانگ کرتگ ءُ کشتگ اَنت۔نادر 6 اپریل ءَ چہ کنداری ، مشکے زور بیگواہ کنگ بیتگ ءُ دومی روچ ءَ آئی ءِ کنٹ دست کپتگ۔ نزام چہ پسنی ءَ پاکستانی لشکر ءَ آوار جتگ 16 اپریل ءَ آئی ءِ ژانگولیں کنٹ دست کپتگ۔ پاروک 14 اپریل چہ ھزدار آوار جنگ بیتگ ءُ 15 اپریل ءَ چہ نال ءَ آئی ءِ کنٹ دست ھزدارکپتگ۔شیرھان نذر چہ تربت ءَ آوار جنگ ءَ پد 17 اپریل ءَ کشگ بیتگ۔نبیل کہ وانگ ءُ زانگ ءُ اھوالکاری ءَ بندوک اَنت ، اپریل ءَ ماں تمپ کالج ءَ ، کیچ ءَ تیر جنگ کشگ بیتگ۔ دوکی ، ھنکین ءَ درآمیدگسی کوش ءِ دْرچ ءَ باز کس سرمچار لیکگ ءُ کشگ بیتگ ، چہ ایشاں مھمد دین مری ، اجاز اھمد ، نبیل مری ءُ ھیر مھمد مھمد ھسنی ھوار اَنت۔
رپورٹ ءَ زانگ بیتگ کہ پاکستانی لشکر ھمے زوراکیاں کنگ ءَ اِنت کہ چہ ھرچ رنگیں گر ءُ بند ءَ آزات اِنت۔ زندان ءِ جاہ ءُ لشکری بندیگجاھانی بارہ ءَ سرپدی نہ دیگ ، سانمندیں مردمانی کھول ءُ وکیلاں گوں آیاں گندک ءَ دارگ اے در مردمی روشت ءِ مزنیں مناکے۔ پانک ءِ رپورٹءِ رد ءَ پاکستانی لشکر ءِ چیردستی ءَ کارکنوکیں مردم کشیں رمبانی پارست ءَ کشگ بیتگیں مردمانی بارہ ءَ ھم گپ جنگ بیتگ ، مردم کشیں رمب پاکستانی لشکر ءِ بلوچستان ءَ چہ درستاں گیش سک دلیں بھر ھمکار اَنت، چہ آئین ءُ راھبند ءَ برزتر مردم کشیں مشین ءِ کرد ءَ پیلو کنگ ءَ اَنت۔
پانک چہ میان راج ءُ ھمگرنچیں تْرامگیجاں لوٹ کنت کہ آ زیت اے ویلانی سر ءَ آزاتیں پٹ ءُ پول بہ کنت ، زور بیگواھیانی بارہ ءَ سرپدی بہ دے اَنت کہ آ پرچا، کج ءَ ءُ کجام میار ءَ گرگ ءُ بند کنگ بیتگ ءُ زور بیگواھیانی زمہ وارانی بگیری ءَ کارروائی کنگ بہ بیت۔
پانک ءَ وتی رپورٹ ءِ گڈ سر ءَ چہ میان راج ءَ دزبندی کرتگ کہ آ زور بیگواھیں مردمانی پھزگ ءَ میان راجی کنونش ءِ منگ ءُ برجاھی ءَ الم بہ کنت ءُ انچیں گامگیج بہ زیر ایت کہ مردمی ھکانی بگیری دارگ بہ بہ اَنت۔ اگاں زیت چوشیں گامگیجے زیرگ مہ بیت گڑا بلوچستان ءَ اے زوراکیں ناں ایوک ءَ مردمانی ھکاں سانمند کن اَنت بلکیں اے پہ سرجمیں دمگ ءِ ایمنی ءُ داشت ءَ داشت ءَ ھم بیھارے۔
