کیچ: شاپک ءَ زور بیگواھیں نئیم رھمت ءِ کھول ءِ نیمگ ءَ برجاھیں زھرشانی نندانک ءَ پنچ روچ سرجم بوتگ کہ انگت برجاہ اِنت۔ زھرشانی نندانک ءَ سبگت اللہ ءَ شاہ جی ءَ ھوار آدگہ سیاسی کارکن ھم ساڑی اَنت۔
چہ زھرشانی نندانک ءَ زور بیگواھیں نئیم رھمت ءِ کھول ءِ گوشگ اِنت کہ اے رندی مئے زھرشانی نندانک ءَ پنچ روچ سرجم بوتگ چہ واکدار ءِ نیمگ ءَ انگت ءَ ھچ وڑیں دلجمیں گامگیج زورگ نہ بوتگ۔
آیانی گوشگ اِنت کہ ما وھدے ساری ءِ رند ءَ اد ءَ زھرشانی نندانک ءَ نشتگیں مارا ھمے گوشگ بوتگ شما دگ ءَ پچ بہ کن اِت ءُ مارا پنچ روچ ءِ وھد بہ دے اِت ما شمئے زھگ ءَ کاراں، اگاں نیارت شمارا الّم پیش دارگ بیت۔ بلے آیاں وتی کول پیلو نہ کرتگ اَنت۔
آیاں گوشتگ کہ انوں مئے زھرشانی نندانک ءَ پنچ روچ اِنت اے پنچ روچ ءِ زھرشانی ءَ ما بزگ ایں ءُ مئے ھواری ءَ آدگہ مساپر ءُ باپار ھم بزگ اَنت ءُ پہ لاچاری ءَ اد ءَ نشتگ اَنت۔
آیاں گوشتگ کہ مارا بس تھنا ھمے گوشگ بیت دگ ءَ پچ بہ کن اِت، ما دگ ءَ ھما وڑ ءَ پچ کن ایں کہ مئے زھگ دیم ءَ آرگ ءُ کھول ءَ پیش دارگ بہ بیت۔
آیاں گوشتگ کہ واکدار پہ دگ ءِ پچ کنگ ءَ دو روچ اِنت پد ماں پد ءَ پیداک اَنت مارا پہ دگ ءِ پچ کنگ ءَ زور دیگ ءَ اَنت بلے مئے زھگ گار اِنت پہ ایشی درگیجگ ءَ انگت ءَ ھچ وڑیں دلجمیں گامگیج زورگ نہ بوتگ۔ دانکہ نئیم رھمت دیم ءَ آرگ نہ بوتگ مئے زھرشانی نندانک برجاہ بیت۔
