شال: پہ زوربیگواھیں مردمانی پد جنگ ءَ برجاھیں وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6042 روچ سرجم بوتگ کہ شال پریس کلب ءِ دیم ءَ گل ءِ چیرمین نسراللہ بلوچ ءِ سروکی ءَ برجاہ بوتگ۔
چہ جتائیں بھرگاں سیادی داروکیں مردم گدان ءَ آتکگ اَنت ءُ گوں زوربیگواھیں مردمانی کھولاں ھمدردی درشان کرتگ ءُ آیاں پہ درسیں زوربیگواھیں مردمانی آجوئی ءَ دلجمی دیگ ءِ لوٹ کرتگ۔
نسرینہ بلوچ ءِ کھول زھرشانی گدان ءَ ساڑی بوتگ ءُ آئی گوں جھانی رسانکدر ءِ اھوالکاراں تران کرتگ ءُ گوشتگ کہ نسرینہ بلوچ پاکستانی پوج ءَ پاری 22 نومبر ءَ چہ ھب چوکی ءَ درکانودی آوار جنگ ءَ پد بیگواہ کرتگ۔
وی بی ایم پی ءِ چیرمین نسراللہ بلوچ ءَ گوں اھوالکاراں تران کرتگ ءُ گوشتگ کہ ریاستی ادارہ ڈیھ ءِ سلامتی ءِ نام ءَ ڈیھ ءِ کانود ءُ انسانی ھکانی سنگینیں لگتمالی کنگ ءُ بلوچستان ءِ جتائیں دمگاں چہ درسیں بھرگاں سیادی داروکیں مردمانی زوریں بیگواھی گیش کنگ بوتگ۔ نوں بلوچ زالبولاں ھم زوربیگواہ کنگ بوگ ءَ اَنت۔ دزگیر کرتگیں مردم نہ کہ آمیدگس ءَ پیش کنگ بوگ ءَ اَنت نہ کہ آیانی بابت کھولاں سرپدی دیگ بوگ ءَ اِنت کہ چہ ایشی سوب ءَ ھزاراں کھول گوں درد ءُ جنجالاں زند گوازینگ ءَ اَنت۔
آئی گوشتگ کہ بژن اِنت اے درکانودی گامگیجانی بگیری ءَ پہ انساپ دیگ ءَ جوڑ کنگ بوتگیں ادارہ وتی کرد ءَ پیلو کنگ ءَ نہ اَنت ءُ سرکار ھم ھچ کنگ ءَ نہ اِنت۔
