بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ ھبدہ مئی 2025 ءَ تر ءُ گردے ءِ میان ءَ گل ءِ کلانھیں ھمبل کیپٹن امجد بشام پنام شمس ساھر ءُ لیپٹینٹ سبراللہ بلوچ پنام واھگ جان سھب ءِ ھپت ءَ کیچ ءِ بنجاھی شھر تربت ءَ پاکستانی لشکرءِ مزنیں بنجل ( ازگر گیٹ ) ءَ گوں گرنیڈ لانچر ءَ ارش کرتگ کہ آ نشانگ ءَ کپتگ اَنت۔ چہ ایشی یک کارمندے مرتگ ءُ دو ٹپی بیتگ۔ چہ کاروائی ءَ پد دوئیں ھمبل چہ اود ءَ در کپتگ اَنت کہ ریاستی لشکر ءَ ڈرون سرویلنس بال داتگ کہ ڈرون ءَ ھمبلانی رندگیری کرتگ ءُ دژمنیں لشکر ءَ دیم ءَ راہ بستگ ایشی آسر ءَ یک میڑے برجاہ بیتگ۔ داں دہ دمان ءَ برجاھیں میڑ ءَ دژمن ءِ دو کارمند مرتگ ءُ یکے ٹپی بیتگ۔ کیپٹن امجد بشام پنام شمس ساھر ءُ لیپٹینٹ سبر اللہ پنام واھد شھید بیتگ اَنت۔
آئی ءَ گوشتگ کہ شھید امجد بشام بلوچ کپٹن ءُ سبر اللہ بلوچ لیپٹینٹ اگدہ ءِ سر ءَ بیتگ اَنت۔ بی ایل ایپ وتی شھیداں ستک شانی ندرکنت ءُ ھمے کول ءَ کنت کہ شھیدانی کاروان راجی آجوئی ءِ گرگ ءُ بلوچستان آجوئی ءِ دروشم ءَ سر بوگ ءَ پہ ھر پیمیں دیمونی دیگ ءَ چک ءُ پد نہ بیت۔
جارکش ءَ گوشتگ کہ امجد بشام بلوچ سکا بودناک، سیاسی پارست ءَ مھکم ءُ باسمائیں ورنایے بیتگ۔ آئی ءِ تہ ءَ سروکی، زانشت ءُ راجی کارانی چیدگ بیتگ۔ آئی اِلمی بودشت، ربیدگی ءُ پروپیشنل زانت ءِ کیاس داں ھمینچک بوتگ اگاں آئی بہ لوٹ اِت اِیں یک آرام ءُ آسودگیں زندے گوازینتگ اَت۔ بلے امجد آسودگیں زندمان ویل کت ءُ پہ ماتیں سرڈگار ءِ آجوئی ءُ راجی شرپ ءَ گھگیری ءِ گرانیں راہ گچین کرت۔شھید امجد چہ نودربری زمانگ ءَ یک مھکم پگر ءُ بودناکی ءِ واھند بیتگ ھمے سوب ءَ آ نودربری ءُ لس مردمانی سیاست ءَ تربت ءَ ناماں بیتگ۔ 2017 ءَ آ لشکری جنگ ءِ پڑ ءَ ھوار بیتگ ءُ دژمن ءِ بگیری ءَ گھگیری کاروائیاں ھوار بیتگ۔ 27 جنوری 2017 ءَ پاکستانی لشکرءَ گوں برات برکت بشام ءَ زور بیگواہ کرتگ۔ ھژدہ ماہ ءِ میان ءَ زوریں بیگواھی ءَ امجد گنتریں جانی ءُ سسائی آزارانی دیمپانی کرتگ بلے آئی توکل مھکم بیتگ۔ آ 29 جولائی 2018 ءَ آجو بیتگ آئی جان چہ آزاراں نزور بیتگ، بلے آئی دل نہ ترس اتگ لھتیں روچانی میان ءَ پد ءَ آجوئی زرمبشت ءِ بھر بیتگ۔ یل بوگ ءَ پد آئی پد ءَ شھر ءَ گھگیری کرد برجاہ داشتگ اَنت۔ مئی 2022 ءَ یک کاروائی یے ءِ میان ءَ ریاستی لشکر ءَ انگر کرتگ اَت بلے امجد بشام گوں جوانمردی ءُ لشکری بودناکی ءَ بے ترس ءَ دژمن ءِ انگر ءِ پروشگ ءُ در آھگ ءَ سوبین بیتگ۔
آئی ءَ گوشتگ کہ آ تربت زانشتجاہ ءِ کمپیوٹر سائنس بھرگ ءَ بی ایس ءِ گڈی سمسٹر ءِ نودربر بیتگ ءُ گوں ایشی ءَ ھوار یک درسرکاری وانگجاھے ءَ انگریزی زبان ءُ کمپیوٹر ءِ ھیل دیگ ءِ پرز ءَ پیلو کنگ ءَ بیتگ۔ آئی زاتی زانشت، راجی کار، دیمونی ءُ نہ ترسی ءِ یک سرجمیں بابے اَت۔
جارکش ءَ گوشتگ کہ شھید سبر اللہ بلوچ یک بے تواریں ھمبلے اَت بلے مھکم توکل ءُ راستیں ھمبلے بیتگ آ کسان امری ءَ ھم گوں راجی زرمبشت ءَ ھمگرنچ بیتگ۔ 2021 ءَ آ گل ءَ ھوار بیتگ ءُ زوت گلءُ لس مردمی نیٹ ورک ءَ جوانیں کردے پیلو کرتگ۔ چہ آئی بودناکی، سنگینی ءُ گل ءِ زانشت ءَ آئی ءَ کسانیں وھدے ءِ تہ ءَ گوں ھما مردماں ھوار کرتگ کہ آیانی سر ءَ نہ تیوک ءَ بیسہ کنگ بیت کرد ءُ رازداری ءِ زمہ واری ھم دیگ بیت۔
آئی ءَ گوشتگ کہ 2023 ءِ میان ءَ آ ریاستی لشکر ءِ چمانی زد ءَ اتکگ آ مزنیں ترسے ءِ دیمپان بیتگ۔ بلے سبر اللہ ءَ پدکنز ءُ بے توار بوگ ءَ ابید گھگیری ءِ راہ گچین کرتگ۔ آ چہ لس مردمانی میان ءَ سرگرمیاں درکپتگ ءُ سلاہ بندیں گھگیری ءِ لڑ ءَ ھوار بیتگ ءُ نوکیں لڑا جنگی پرز ءِ پیلو کنگ ءَ بیتگ۔ آ سکا چیریں ءُ مزنیں کارانی بھر بیتگ ءُ یک مزنیں وھدے ءَ دژمن تاوان داتگ ءُ جتائیں ھنداں کار ءَ بیتگ۔
جارکش ءَ گوشتگ کہ سبر اللہ یک سکا مھکم توکلیں ھمبلے بیتگ۔ آ زاتی نام ءُ ستا ءِ لوٹوک نہ بیتگ بلکیں گوں آجوئی ءِ مول ءَ ھمگرنچ ءُ لیکہ ءِ راستی ءِ سر ءَ سدک بیتگ، گوں توکل ءُ جوانمردی ءَ داں گڈی ءَ دم ءَ جھد کنگ ءَ بیتگ۔
میجر گھرام بلوچ ءَ گوشتگ کہ چہ ھمبلانی شھیدی ءَ گل ءَ نہ ترس ءُ پرز شناسیں ھمبلانی تاوان بیتگ۔ بلے آیانی دیمونی پہ مئے جھد ءَ ھما رژنائیں چراگ اَنت پہ آھوکیں پدریچاں رھشونی ءِ بنشون جوڑ بنت۔
