تمپ: بلوچ یکجھتی کمیٹی ءِ نیمگ ءَ ڈاکٹر ماہ رنگ، سمی دین، بیبو بلوچ، بیبگر بلوچ، سبگت اللہ شاہ جی ءُ آدگہ مردمانی دزگیر کنگ ءِ بگیری ءَ چہ گلام پمپ ءَ داں یو بی ایل بینک ءَ زھرشانی روانکے کشگ بیتگ ءُ یو بی ایل بینک ءِ دیم ءَ مچ بیتگ اَنت۔ اے روانک ءَ تمپ ءِ جتاھیں میتگانی زھگ ءُ جنیناں ھوار مردماں بازیں کچے ءَ بھر زرتگ۔
مردماں تران کرتگ ءُ گوشتگ کہ بی وائی سی ءِ سروک ڈاکٹر ماہ رنگ بلوچ، سمی دین بلوچ، بیبگر بلوچ ءُ بیبو بلوچ ءِ درکانودی آوار جنگ ءُ بلوچ سروکانی نام ءَ دروگیں ایپ آئی آر نبشتہ کنگ ءُ آیاں ترسینگ اے درسیں ریاست ءِ بے سوبی ءِ منّانک اَنت۔
آیاں گوشتگ کہ بی وائی سی ءِ بگیری ءَ سرکار ءِ زوراکی کنگ ھمے چیز ءَ پیش دار ایت کہ ریاست بلوچستان ءِ مھلوک ءِ تہ ءَ ترسے ودی کنگ لوٹ ایت۔
آیاں تران کرتگ ءُ گوشتگ کہ مئے ائید گوں اَرس ءُ وتی آزیزانی یاتاں گوزگ ءَ اَنت۔
زھرشانی کنوکاں ڈاکٹر ماہ رنگ بلوچ ءُ آدگہ دزگیر کرتگیں سروکانی آجوئی ءِ لوٹ کرتگ ءُ سرکار ایر جتگ۔
