بلوچ وومن پورم ءِ بنجاھی جارکش ءَ وتی شنگ کرتگیں درشانے ءَ گوشتگ که لس بلوچاں ھوار تیوک ءَ جنینانی بگیری ءَ چه سرکاری ادارھانی نیمگ ءَ زوراکی ترند بوگ ءَ اِنت. ریاستی اداره په کجام ھم ھد ءَ روگ ءَ جاڑیگ اَنت دانکہ انسانی ھکانی بگیری ءَ برجاھیں لس بلوچانی ایمنیں جھد دارگ بہ بیت۔ . زی در سرکاری نادراھجاه ءَ سییده بلوچ ءُ آدگه بلوچ زالبول درکانودی آوار جنگ بیتگ اَنت ءُ مرچی سھب ءَ بلوچ یکجھتی کمیٹی ءِ بنجاھی باسک بیبگر بلوچ ءِ گس ءَ درکانودی بیڑ برگ ءُ آ گوں کستریں برات ءُ پی ایچ ڈی نودربر ڈاکٹر ھمل زھری ءَ آوار جنگ ءُ بیگواه کنگ بیتگ اَنت که اِے ریاست ءِ درکانودی کارانی ءُ بلوچ ءِ توار ءِ دارگ ءِ تچکیں منانک اِنت۔
آئی ءَ گوشتگ که دومی نیمگ ءَ بلوچ نودربرانی ھاسٹلز ءُ گسانی سر ءَ بیڑ برگ برجاه اِنت ءُ شپاں آ پجار ءِ بنیاد ءَ آزار دیگ بوگ ءَ اَنت. دوشی بولان میڈیکل زانشجاه ءِ وائس پرنسپل ڈاکٹر الیاس بلوچ ءُ آئی ءِ کھول ھم بیڑ برگ ءِ میان ءَ آزار دیگ بیتگ اَنت ءُ چه ایشی ءَ پد آ ءُ آئی ءِ زھگ زور بیگواه کنگ بیتگ اَنت۔ ریاستی زوراکیانی اِے دروشم نه اِیوک ءَ بلوچ راج ءِ ته ءَ بلکیں چاگرد ءِ ته ءَ ناگیگی ءُ بے تاھیری ودی کنگ ءَ اِنت۔
جارکش ءَ گوشتگ که ما ریاستی ادارھانی اِے وڑیں درکانودی کار ، زوریں بیگواھی ءُ زوراکیاں گوں ترندیں دانکاں ایر جن اِیں. ما گوں سرکار ءَ لوٹ کن اِیں زوربیگواه کنگ بیتگیں درستیں مردم یل کنگ بہ بنت دانکہ پہ بلوچ ءِ ھکانی ایمنیں جھد ءِ دارگ ءَ ابید شریں گامگیجے زورگ بہ بیت۔
