بلوچ وومن پورم ءَ وتی شنگ کرتگیں درشانے ءَ گوشتگ کہ بلوچ وومن پورم ھب ءُ آدگہ ھنداں بی وائی سی ءِ ایمنیں زھرشانیانی سر ءَ ریاستی تیرگواری، دزگیری، لٹ ءُ کٹ گوں زھرشانی کنوکاں زوراکیاں گوں ترندیں دانکاں ایر جنت۔ اے ویل ریاستی زوراکیانی نوک ءُ ترسناکیں مسالے۔ اے نہ تھنا بنیادی انسانی ھکانی بگیری اِنت بلکیں بلوچانی سیاسی ھستمان ءُ توار ءِ گوں زور ءَ دارگ ءِ جھداِنت۔
آئی ءَ گوشتگ کہ بلوچ وومن پورم اے گپ ءِ سر ءَ گیش بژن درشان کنت کہ ھب ءَ درزنانی کچ ءَ زھرشانی کنوک وتسر ءَ دزگیر کنگ بیتگ اَنت، آیانی تہ ءَ جنین ءُ ورنا گوں اَنت۔ زھرشانی کنوکانی سر ءَ تچک ءَ تیرگواری ءُ لٹءُ کٹ کنگ ءِ پارست ءَ ترس ودی کنگ ءِ جھد اِنت۔
آئی ءَ گوشتگ کہ ھب ویل نہ تھنا بنیادی انسانی ھکانی تچک ءَ بگیری اِنت بلکیں بلوچانی سیاسی آجوئی،گھگیری ھک، راھبند ءِ درشان ءَ سر ءَ یک تچکیں ارشے۔
آئی ءَ گوشتگ کہ بلوچ وومن پورم تچک ءَ گوش ایت کہ بلوچ جنین تھنا نزور نہ اَنت بلکیں گھگیری ءِ سروک اَنت۔ چہ ڈاکٹر ماہ رنگ بلوچ، بیبو بلوچ ءُ آدگہ سروکانی دزگیریاں بلوچ جنینانی توکل ءِ پروشگ ءَ بے سوب بیتگ اَنت۔
آئی ءَ گوشتگ کہ چہ ریاستی تیرگواری ءُ لٹ ءُ کٹءَ یکبرے ھمے گندگ بیتگ کہ ریاست نہ تھنا بلوچانی سیاسی پجار من ایت، نہ اے پر ایمنیں زھرشانیاں زوریں بیگواھی درچ ءُزھرشانی کنوکانی سر ءَ تیرگواری کنگ ھمے گپ ءِ مسال اِنت کہ ریاست راجمستری ءِ نام ءَ زوراکی کنگ ءَ اِنت۔
