بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں ھاران، بلیده، زامران ءُ کلات ءَ پنچ جتائیں اُرشاں زورگریں پاکستانی لشکر ءُ آئی ءِ چریک نشانگ کرتگ اَنت. چیرکرتگیں شورھانی تراک ءُ چوکیانی سر ءَ اُرشاں دژمن ءِ شش کارمند مرتگ ءُ باز ٹپی بیتگ۔
آئی ءَ گوشتگ که بی ایل اے ءِ سرمچاراں مرچی کیچ ءِ ھند بلیده، زیردان ءَ زورگریں پاکستانی لشکر ءِ بمب چاروکیں ٹولی ءِ پیادگیں کارمند ھما وھد ءَ گوں دو تراک ءَ نشانگ کرتگ آ بمب چارگ ءَ بیتگ اَنت. تراکانی آسر ءَ دژمنیں لشکر ءِ دو کارمند مرتگ ءُ یکے سکا ٹپی بیتگ.
جارکش ءَ گوشتگ که ھمے وڑ ءَ بی ایل اے ءِ سرمچاراں کیچ ءِ ھند زامران، گیشردان ءَ زورگریں پاکستانی لشکر ءِ کاروان ءَ ھواریں گاڑی یے گوں چیرکرتگیں شورھاں نشانگ کرتگ که چه ایشی ءَ دژمن ءَ جانی ءُ مالی تاوان بیتگ.
آئی ءَ گوشتگ که بی ایل اے ءِ سرمچاراں 11 مارچ ءَ ھاران ءِ ھند گزی دگ ءَ پاکستانی لشکر ءِ برجاھیں چوکی ءِ سر ءَ اُرش کرتگ. اِے کاروائی ءَ سرمچاراں دژمنیں لشکر ءِ سنگرانی سر ءَ بازیں گرنیڈ لانچر گولا آس داتگ ، چه ایشی ءَ دژمن جانی ءُ مالی تاوان ءِ دیمپان بیتگ.
جارکش ءَ گوشتگ که دگه یک کاروائی یے ءَ 12 مارچ ءِ شپ ءَ بی ایل اے ءِ سرمچاراں ھاران ءِ ھند گرُک ءُ دالی ءِ میانجی ءَ زورگریں لشکر ءِ برجاھیں چوکی یے نشانگ کرتگ. اُرش ءَ وتکار سلاه ءُ راکٹ لانچر کارمرز کرتگ اَنت. داں بیست دمان ءَ برجاھیں اُرش ءَ دژمن ءِ سے کارمند جاھی مرتگ ءُ کم چه کم چار کارمند ٹپی بیتگ. چه ایشی ءَ اَبید زورگریں لشکر سکا مالی تاوان بیتگ.
آئی ءَ گوشتگ که گوستگیں روچ ءَ کلات ءِ ھند منگچر بازار ءَ پاکستانی لشکر ءُ چیریں ادارھانی چریک تیرگواری کرتگ ءُ کشتگ. کشگ بیتگیں چریک گنوک ءِ دروشم ءَ په پاکستانی لشکر ءَ چاریگی کنگ ءَ بیتگ.
جیھند بلوچ ءَ گوشتگ کہ اے درسیں اُرشانی زمہ واری ءَ بی ایل اے منّ ایت۔
