بلوچ یکجھتی کمیٹی ءِ سروک ءُ زوربیگواھیں ڈاکٹر دین مھمد ءِ جنک سمی دین بلوچ ءَ وتی شنگ کرتگیں درشانے ءَ گوشتگ که 28 پروری ءَ پاکستانی لشکر ءَ مشکے ءِ ھند شریکی ءَ میتگے ءَ بیڑ برتگ ءُ ھشت بلوچ ورنا چه کھول ءِ دیم ءَ آوار جتگ ءُ زوربیگواه کرتگ، ایشی بابت ءَ بازیں انسانی ھکانی ادارھاں ھم گزارش شنگ کرتگ.
سمی دین ءَ گوشتگ که 1 مارچ ءَ آیانی کھولاں په وتی زھگانی یل کنگ ءَ مشکے نلی بنجل ءَ شتگ انت، بنجل ءَ پاکستانی لشکر ءِ ساڑی ئیں میجر ءَ من اِتگ که ھشتیں ورنا لشکر ءِ کر ءَ اَنت ءُ آ چه جست ءُ پرس کنگ ءَ پد مرچی یل کنگ بنت. بلے دوشی ادار سے ءِ نزیک ءَ چه آیاں چار ورنا کامران الیم ، مھراج ، مومن اسلم ءُ ھپیز ویرانیں جاھے ءَ تیر جنگ ءُ کشگ بیتگ اَنت. مرچی سھب ءَ وھدیکه کھول په آیانی یل کنگ ءَ لشکر ءِ بنجل ءَ روگ ءَ بیتگ اَنت راه ءِ سر ءَ آیاں وتی آزیزانی لاش دیستگ اَنت. آدگه چار ورنا انگت لشکر ءِ کر ءَ اَنت ، آیانی بابت ءَ انگت ھچ وڑیں ھال نیست.
آئی ءَ گوشتگ که درکانودی کوش ناشرکاری ءِ گنتریں ءُ رستری دروشم اِنت که اود ءَ پیسر ءَ مردم زور بیگواہ کنگ بنت، آیاں رسترانی وڑ ءَ جانی ءُ سسائی آزارانی نشانگ کن اَنت ءُ پد ءَ دروگیں میڑاں کش اَنت ءُآیاں ناشرکار لیک اَنت۔ چہ ایشی ءَ ابید اے زوراکی چہ مزنیں رسانکدری ادارھاں شنگ نہ بنت ءُ نہ سرکار پہ ایشاں جیڑ ایت۔
