بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ وتی شنگ کرتگیں درشانے ءَ گوشتگ کہ پاکستانی لشکر ءَ یک رندے پد ءَ وتی نوک آبادکاریں سنچ پیش داشتگ ءُ بلوچ اسٹوڈنٹس ایکشن کمیٹی ءِ جتگیں کتاب میڑہ ھلاس کرتگ۔ وھدے کہ ھمے وھد ءَ آدگہ بھرگاں ھمے کتاب میڑہ ءِ موکل دیگ ءَ اِنت۔
آئی ءَ گوشتگ کہ اے جیڑہ تیوک ءَ گوں کتاباں بندوک نہ اِنت بلکیں اے پاکستان ءِبلوچ نودربرانی دارگ ءُ آیانی چہ زانت ءُ زانشت ءَ زبھر کنگ اِنتءُ شرگداری ءُ سیاسی زانشت ءِ ھلاس کنگ ءِ مھکمیں شوربندی ءِ بھر اِنت۔
ڈاکٹر نسیم ءَ گوشتگ کہ چہ دھکاں پاکستان اچ بلوچ نودربر ءُ زانوگراں یک ترسے مارگ ءَ اِنت۔ چی ءَ کہ آئی ءَ گمان بوگ ءَ اِنت زانتءُ زانشت اے ریاست ءِ پہ بلوچستان ءِ زورگپتی ءَجنجال ودی کنت۔ زوریں بیگواھی، وانگجاھاں باسمائیں وانندگانی سر ءَ ارش ھمے شوندات ءِ درچ اِنت۔ ایشی مول بلوچانی توار ءِ دارگ ءُھرپیمیں گھگیری ءِ ھلاس کنگ اِنت۔
آئی ءَ گوشتگ کہ ما اے کار ءَ ایر نہ جن ایں چی ءَ کہ ایرجنگ ءِمول ھمیش اِنت کہ ما دگہ شری ءِ اوستے دار ایں۔ بلوچ راج چہ پاکستان ءَ انساپ ءِ اوست ءَ نہ دار ایت۔ اے گپ گوستانک ءَ راست کرتگ کہ یک نوک آبادکاریں ریاستے مدام زوراکی کنت ءُ ایردستیں راج ءَ چہ زانت ءُ زانشت ءَ پدمنتگی ءِ نیمگ ءَ تیلانک دیگ ءَ ھرپیمیں پندل سازی کنت۔ ھمے سوب ءَ بلوچستان ءِ آجوئی جھد نہ تیوک ءَ یک سیاسی زرمبشتے، بلکیں یک لیکہ ءُ دودمانی جنگجاھے۔
ڈاکٹر نسیم بلوچ ءَ گوشتگ کہ چہ درسیں ریاستی زوراکیاں ابید بلوچ نودربر وتی کردی ءُ سیاسی گھگیری ءَ برجاہ دار اَنت، دربر اَنت ءُ پہ وتی ھکاں جھد کن اَنت۔
