پنجاپ: بلوچ اسٹوڈنٹس کونسل ءِ نیمگ ءَ کیچ ءَ کشگ بیتگیں بلوچ نودربر اللہ داد ءِ ناھکیں کوشءِ بگیری ءَ لاھور پریس کلب ءِ دیم ءَ زھرشانی کنگ بیتگ۔ زھرشانی ءَنودربر، سیاسی ءُ چاگردی کارکن ءُ انسانی ھکانی کارکناں بازیں کچے ءَ بھر زرتگ۔
زھرشانی کنوکیں مردماں اللہ داد بلوچ ءِ اکس، بینر ءُ پلے کارڈ دستاں بیتگ کہ آیاں پہ بلوچ چکچینی ءِ بگیری ءَ اوگام جتگ ءُ بیگواھیں مردمانی آجوئی ءِ لوٹ کرتگ۔
آیاں تران کرتگ ءُ گوشتگ کہ انوں کیچ ءَ اللہ داد بلوچ کشگ بیتگ اے تیوک ءَ یک مردمے ءِ سر ءَ ارش نہ اِنت بلکیں ھمک بلوچ ءِ پجار ءِ سر ءَ ارش زانگ بیت۔ بلوچانی چکچینی ھمیش اِنت کہ یک یک ءَ مئے بلوچ نودربر ءُ وانندگ نشانگ بوگ ءَ اَنت ھمے پیم ءَ ریاست ءَ بنگالیانی چکچینی کرتگ۔
آئی ءَ گوشتگ کہ تیوک ءَ 2025 ءَ ھشتاد ءُ ھشت بلوچ زور بیگواہ کنگ بیتگ ءُ شانزہ ءَ گیش مردم درکانودی کشگ بیتگ ۔ انگت ءَ ھمے گپ جنگ بیت کہ بلوچ بیا اَنت ءُ مئے گون ءَ بہ نند اَنت ءُ گپ ءُ تران بہ کن اَنت۔ مارا ھپتاد سال بیت کہ ھمے زوراکیانی بگیری ءَ شمئے ادارھانی دیم ءَ توار چست کنگ ءَ ایں۔ بلے چہ ایشی ءَ ابید مئے گون ءَ زوراکی کنگ بیت۔ مئے جنینانی چادر چکگ بیت۔
آئی ءَ گوشتگ کہ ریاست ءَ زانگ لوٹ ایت کہ بلوچ ھچ وڑ ءَ تئی زوراکیاں نہ من ایت۔اللہ داد ءِ میار ھمیش اِنت کہ آ بلوچے بیتگ۔
