ھزدار: بلوچ یکجھتی کمیٹی نال ھنکین ءِ نیمگ ءَ زوربیگواھی ءُ انسانی ھکانی لگتمال کنگ ءِ بگیری ءَ زھرشانی روانکے کشگ بیتگ۔
بنشون ءِ رد ءَ روانک چہ شاشان درمانجاہ ءَ درکپتگ ءُ شادیزھی چاراہ ءَ مچ بوتگ۔ روانک ءَ بھر زرتگیں مردماں دوازدہ سال پیش زوربیگواہ کرتگیں زاکر اسمائیل ءِ زوربیگواھی ءُ تربت ءَ بلوچ نودربر اللہ داد واھد ءِ درکانودی کوش، ھاران ءَ دوئیں برات مبارک بلوچ ءُ الی بلوچ ءِ زوربیگواھی ءُ اسما بلوچ ءِ آوار جنگ ءِ بگیری ءَ تران کرتگ۔
آیاں لوٹ کرتگ ءُ گوشتگ کہ زوربیگواھیں مردم زوت آجو کنگ ءُ انسانی ھکانی لگتمالی ءِ ھلاس کنگ بہ بیت۔
