شال: بلوچ یکجھتی کمیٹی ءِ نیمگ ءَ برجاھیں زھرشانیانی درچ ءَ مرچی شال ءُ کراچی ءَ زھرشانی روانک کشگ بوتگ اَنت۔ دوئیں شھراں زھرشانیاں بازیں کچے ءَ مردماں بھر زرتگ۔
شال ءَ مرچی بلوچ یکجھتی کمیٹی ءِ نیمگ ءَ چہ بلوچستان زانشتجاہ ءِ دیم ءَ زھرشانی روانک در کپتگ ءُ جتائیں جاھاں ترّ ءُ گرد کنگ ءَ پد کمبرانی دگ ءَ بشیر چاراہ ءَ مُچ بوتگ اَنت۔
ھمے وڑ ءَ یک شمبے ءِ روچ ءَ بلوچ یکجھتی کمیٹی ءِ نیمگ ءَ چہ کراچی ءِ ملیر شراپی گوٹ ءَ زھرشانی روانک در کپتگ ءُ شاہ الی گوٹ ءَ مچ بوتگ اَنت۔
دوئیں جاھاں زھرشانی روانکاں زور بیگواھیں مردمانی کھولانی ھواری ءَ سیاسی ءُ چاگردی کارکن ءُ لس مردماں بھر زرتگ۔ زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت۔
زھرشانی کنوکیں مردماں زوریں بیگواھی ءُ دروگیں میڑاں زور بیگواھیں مردمانی ناھکیں کوش ءِ بگیری ءُ اسلام آباد ءَ برجاھیں زھرشانی نندانک ءِ پلہ مرزی ءَ اوگام جتگ۔
زھرشانیاں مردماں تران کرتگ ءُ پاکستانی لشکر ءِ زوراکی ایر جتگ اَنت ءُ اسلام آباد ءَ برجاھیں زھرشانی نندانک ءِ لوٹانی پیلو کنگ ءِ لوٹ کرتگ۔
