بلوچ یکجھتی کمیٹی سروک ءُ زوربیگواھیں ڈاکٹر دین مھمد ءِ جنک سمی دین ءَ وتی شنگ کرتگیں درشانے ءَ گوشتگ کہ پہ بیگواھیں مردماں جوڑ کنگ بوتگیں کمیشن ءَ من یکبرے پد ءَ گوں وتی پت ءِ کیس ءَ ھوار آدگہ بیگواھیں مردمانی کھولاں پیش بوتگ ایں۔ بلے چو مدامی وڑ ءَ مرچی ھم مارا یکیں جست کنگ بوتگ کہ شمئے مردم کئے ءَ برتگ اَنت؟ شازدہ سال ءِ گوزگ ءَ پد مرچی ھم مارا پسہ دیگ ءِ جاہ ءَ جست کنگ بیت۔ کمیشن ءِ سنگینی ھمیش اِنت۔
آئی گوشتگ کہ زی پیشی ءَ مارا یک نوکیں پارمے دیگ بوتگ کہ اود ءَ نبشتگ کہ بیگواھیں مردمانی کھول پارم ءَ پر بہ کن اَنت ءُ پنجاہ لک کلدار بہ گر اَنت ءُ بے توار بہ بنت۔ اے سرکار ءِ نیمگ ءَ ،مئے بیگواھیں آزیزانی نھاد بندگ ءِ دگہ یک جھدے۔ ما پیش ءَ ھم اے وڑیں گپ رد کرتگ اَنت چی ءَ کہ کلدار مئے درد ءُ جنجالاں یا مئے آزیزانی زند ءِ جاہ ءَ نہ گیت۔ اے وڑیں گپ مئے ٹپانی سر ءَ واد گیجگ ءُ مئے واھشتانی کمشرپی اِنت۔
آئی گوشتگ کہ اگاں ریاست راستے کہ پہ بیگواھیں مردمانی کھولاں چیزے کنگ لوٹ ایت گڑا مئے جستانی پسھاں بہ دنت کہ مئے مردم چون ءُ کج ءَ اَنت۔ کمیشن وتی سنگینی ءِ منانک ءَ بہ دنت ءُ دوبر جستانی جاہ ءَ ھکانی سر ءَ گامگیج بزور ایت۔
سمی دین ءَ گوشتگ کہ ما وتی بیگواھیں آزیزانی آجوئی ءُ راستی ءِ لوٹ ءِ سر ءَ اوشتاتگ ایں۔ ھچ نھاد ءُ ھچ لوٹ مارا بے توار کرت نہ کنت۔ ما تھنا وتی آزیزانی بابت ءَ راستی ءَ لوٹ ایں۔
