شرفمند آ صحافیک
نم غٹ جوان وڑٹ واخب ہُرے کہ بلوچستان ئٹی تدوکا بھلو وخت ئسے آن خاخر و دتر نا گوازی مننگ ءِ ہرا نا نسخان آن داسکان ءِ ہچو دونو اُراس اف کہ رکھوک مرے ۔ بلوچستان ئٹی دونو ہچو اُراس اف کہ ہرا ٹی کس بیگواہ ، کھسفنگ یا جم وڑ نا سزا تیان ٹِک کننگتنے ۔ بھلو وخت ئسے آن برجاء دا خلنگ و کھسفنگ ئٹی کمبوتی ہتنگ و دا خاخرے کھسفنگ نا جاگہ غا ریاستی ادارہ غاتا پارغان جتا جتا واقعہ غاتا دروشم ئٹ دا حالیت آتے پین ترندی ئٹ خراب کریسہ کننگو ۔ اگہ بلوچستان ئٹی برجاء خلنگ و کھسفنگ ، زورانسری بیگواہی و جم وڑٹ سزا تا دا عمل ءِ توننگ متو تو دانا بھاز خراب ءُ بھرم ئس مروئے ۔ ریاست نا ذمہ واری مریک کہ او اسہ ویل ءِ امن ایمنی ئٹ سرجم کننگ نا کوشست کے ولے بلوچستان ئٹی بھلو وخت ئسے آن حالیت آک پین ڈول نظر بننگو ، اینو سیلاب آن بلوچستان ٹپی ءِ زیارت واقعہ غا متاثر مروکاک داسکان ءِ انصاف اکن ہروکو ولے دا غٹ ءِ سرجم کننگ نا جاگہ غا تدوکا دے زہرہ بلوچ آ جلہو کننگا ہراڑان او نیک بختی ٹی بچا ولے جلہو آن دا ساف مس کہ جم سزا نا وڑٹ متاثر مروکا خاہوت آتے ٹِک کننگ نا عمل داسکان ءِ برجاء ءِ ہرا بھلو ڈکھ و فکر ئنا ہیت ئسے ۔
بلوچستان ئٹی جم سزا نا وڑٹ دا وخت اسکان کیہی خاہوت آتے ٹِک کننگانے تدوکا دے زہرہ بلوچ آ جلہو ہندا سلسلہ نا اسہ کڑی ئسے ۔زہرہ بلوچ نا خاہوت تدوکا کیہی سال آتیان جم سزا تون مون تننگ ءِ ہراٹی اونا خاہوت بے کچ جانی و مالی نسخان ہرفوئی تمانے و دا عمل داسکان ءِ اونا برخلاف برجاء ءِ ہرا اسہ جنگی ڈوہ اسے و دوننگا عمل تے زوت توننگ المی ءِ ولے پن ئنا سیکورٹی نا پن آ بلوچستان ئٹی فورسز و اوتا جوڑ کروکا سٙلاہ بند آ ٹولہ غاتے تاغت و ہر وڑ کننگ نا اختیار تننگانے ہرا بلوچستان ئٹی انسانی حق آتے لتاڑنگ تون اوار دا جاگہ نا سیاسی و چاگڑدی دود آتے ہم نت تا کیرغ کننگو ۔ زہرہ بلوچ آ جلہو جم سزا نا پوسکنو سلسلہ سینا بناء مننگ کیک ولے غٹ ادارہ غا تیا دا گڑا پاش مرے کہ دوننگا بے ڈول آ گام آتے ہرفنگ آن او تینا مسخت آتیٹ سرسہب مننگ کپسہ بلکن دوننگا عمل تا برخلاف مخلوق پین ترندی ئٹ مونا برور ۔
جلہو کروک آتے دا ہیت ئنا علم اف کہ بلوچ چاگڑد نیاڑی تا رد ئٹ بھاز سخت ءِ ۔ نیاڑی تیا دوننگا خونی آ جلہو تے بلوچ چاگڑد تینا وجود آ جلہو سرپند مریک ۔ بلوچ نیاڑی تیا جلہو و اُست ہشوکا گام آ تیان بلوچستان ئٹی لگوکا خاخر پین ترندی ئٹ لگوئے و دا بھرم ہر وخت آنبار یخین ئٹی بھاز بے ڈول و خطرناک مروئے ۔ شہید کریمہ بلوچ نا کینیڈا ٹی شہادت نا برخلاف ہرا رد عمل بلوچستان ئٹی خننگا اوڑان حکمران آک ہوش پام کیر ۔
دا پریس کانفرنس نا رد ئٹ مچا بلوچستان ئٹی سیاسی جماعت آک ، چاگڑدی تنظیم ، وکیل و خوانندہ گل و زند ئنا ایلو تپہ غاتیان تعلقدار آ بندغ آتے دا کلہو ءِ رسیفنگ خواہنہ کہ اوفک اینو ہم ہر وخت آنبار چُپ مریرہ یا مذمتی بیان آ تیان بیدس عملی ءُ گام ہرفرہ ۔ اینو سیاسی وڑٹ متاثر مروکا بندغ آتا خاہوت آتے ٹِک کننگو اگہ دا نا برخلاف ترندی ئٹ مزاحمت کننگتو تو او وخت مُر اف کہ نیاڑی تے ٹِک کننگ نا عمل سیاسی وڑٹ بشخ ہلوک خاہوت آ تیان پیشتمسہ لس مخلوق اسکان رسینگوئے ۔ بلوچ یکجہتی کمیٹی دا ہیت آ یخین تخک کہ دا ظلم و زوراکی نا مقابلہ ءِ لس مخلوق نا مزاحمت آن مریک لس مخلوق نا مزاحمت ہی دا غٹ زوراکی تا کسرتے توننگ کیک ۔
