بلوچستان ئٹی ہار و نوکاپ نا دیر تا سوب آن مروکا بھس کاری تیان گڈ ڈسٹرکٹ پشین ئٹی چنک بھلن غٹ اُست و پڈ ئنا ناجوڑی نا گواچی مسنو۔
پشین ئٹی اُست و پڈ ئنا ناجوڑی نا تالان مننگ آن 2 چنا بیران و درزن آ بندغاک زیمی مسنو۔ حوال تا رد ئٹ پشین نا علاقہ کلی شیخالزئی ٹی تدوکا دے محمد اسلم پنی ءُ بندغ ئسے نا اِرا چنکو چنا اُست و پڈ ئنا ناجوڑی آن بیران مسونو۔
ڈسٹرکٹ ہیلتھ آفیسر پشین ڈاکٹر غفار اُست و پڈ ئنا ناجواری آن چُنا تا کہنگ ءِ پک کرینے۔ کہوکا چناک حقی ءُ ایڑ مسونو و 6 و 9 ئنا عمر ئٹی مسونو۔
ڈب خانزئی ٹی ہم اُست و پڈ ئنا ناجوڑی آن زیمی مروکا چنا تے خڑک ئنا اسپتال آ سر کننگانے۔ ولے اسپتال ٹی دارو تا مفننگ نا سوب دوارہ اُراغا رادہ کننگانو۔
علاقہ نا بندغاک حکومت آن خواست کرینو کہ بی ایچ یو ملکیار و ایلو علاقہ آتے زوت دا ناجوڑی آن رکھنگ کن دارو سر کننگ مرے۔
