آواران: بلوچ نیشنل موومنٹ نا بندغی حق آتا ادارہ سوشل میڈیا (ایکس) آ آواران ئٹی پاکستانی لشکر و ڈھکوک ادارہ آتا جوڑ کروکا ڈیٹھ اسکواڈ نا دو آن بے گناہ آ بندغ آتا خلنگ نا بارَو ئٹ پارے کہ 08 نومبر آ بزداد نا ہند بانڈمی ٹی پاکستانی لشکر نا جوڑ کروک ڈیتھ اسکواڈ نا کارندہ آک عبدالصمد نا اُراٹی پیہِسا اودے برمتہ کننگ نا کوشست کریر مزاحمت کننگ آ اونا زائیفہ و باوہ قاسم ئے ٹپی کریر اوکان پد عبدالصمد ئے سُمکاری کرِسا خلکُر۔
اسہ پین تدینی ئسیٹی ہندا شام آواران نا ہند پیراندر رسول بخش بازار ئٹی ڈیتھ اسکواڈ نا کارندہ آک نور بخش ولد صاحبداد پنی او بندغ ئسے توفک نا زور آ برمتہ کرِسا اُراغان مچِٹ مُر سُمکاری کرِسا خلکُر۔
پانک ئنا رد ئٹ 19,20 اکتوبر 2023 آ گیشکور نا ہند ئٹی کاریم کروکا ڈیتھ اسکواڈ آک کولواہ، گشناک، بزداد بندامی و پیراندر نا ہند آتیٹی قتل عام کریر۔ 19 اکتوبر آ گوشانک ئٹی ڈیتھ اسکواڈ نا کارندہ آک دل مراد ولد محمد جان نا اُراٹی پیہِسہ سُمکاری کرِسا دل مراد و اونا زائیفہ ئے خلکُر۔
پانک تینا ایکس آ ایسر ئٹ نوشتہ کرے کہ ہندی ڈیتھ اسکواڈ آتا ذریعہ ئٹ مروکا تشدد اجتماعی سزا تننگ ئے پاش کیرہ و دُن اِنگا کاریمک بندغی و بندغ آتا بنیاتی حق آتا برخلاف ءُ۔ دُن اِنگا جرم آتے توننگ کن ہر پلیٹ فارم آ توار بُڑز کننگ مرے تانکہ جہانی ادارہ آک پاکستانی لشکر ،ڈھکوک ادارہ آتا زور شاغِر۔
