نیدرلینڈ ایمسٹرڈیم ئٹی بلوچ نیشنل موومنٹ نا پارہ غان بندغی حقوق آتا جہانی دے آ بلوچستان ئٹی بندغی حق آتا خلاف ورزی تا اسہ سینمار ئس اڈ تننگا۔
سینمار ئٹی بلوچ نیشنل موومنٹ نا باسک آک ، بلوچ کمیونٹی و بندغی حق آتا باسک آک بھلو کچ ئسے ئٹ بشخ ہلکُر۔
سینمار ئٹی شہدائے بلوچستان کِن ارِا منٹ چپی مس و پدا پاکستانی فورسز نا پارہ غان بلوچستان ئٹی بندغی حق آتا خلاف ورزی آ ڈاکومنٹری فلم ئس چلیفیر۔
سینمار ئٹی پاکستانی ماہر سیاسیات و مصنفہ ، ڈاکٹر عائشہ صدیقہ بلوچستان و خیبر پختون خواہ ئٹی بندغی حقوق آتا خلاف ورزی آ پارے کہ اینو اسہ پاکستانی ئس مننگ نا سوب آن کنا کاٹُم شرمندئی آن شیف مسُنے ۔
او پارے کہ داٹی ہچو شک ئس اف کہ بلوچستان ئٹی پاکستانی فورسز نا پارہ غان بلوچ نسل کشی مننگ اف۔
او پارے کے بلوچستان یا بلوچ نسل کشی آ کس ہیت کے تو پاکستانی فورسز نا پارہ غان اودے یا بیگواہ کننگِک یا سبین محمود آنبار کھسفنگِک۔
ڈاکٹر عائشہ صدیقہ پارے کہ پاکستانی فوج بلوچستان ئے نو گو ایریا جوڑ کرینے، میڈیا بلیک آؤٹ ءِ ، ہزار آ بندغ آک بیگواہ ءُ۔
او گیشتِر پارے کہ پاکستانی فوج ہرا ظلم و بربریت ئے بنگلہ دیش ئٹی کریس ئس اینو ہمودے بلوچستان و خیبرپختونخوا ٹی دُوارہ کننگ ءِ ۔
او پاریر کہ دنیا بلوچستان ئٹی بندغی حق آتا خلاف ورزی تیا نوٹس ہلے اوڑان مُست کہ ہُرے مرے۔
