شال: بلوچ نیشنل موومنٹ نا بندغی حق آتا ادارہ پانک تینا اگست 2023 نا رپوٹ ءِ شِنگ کرے ۔
رپورٹ ئٹی توہین مذہب نا الزام ئٹی عبدالرؤف برکت ءِ خلنگ، دے کہیئلینگی بلوچستان ئٹی ھانی گل و اونا اَرِغ سمیر ءِ خلنگ، جھل مگسی ٹی زمیندار امداد جویو نا خلنگ، نور خاتون و اُونا چُنا تے بیگواہ کنِنگ، جبر ئٹ بیگواہ مروکا غلام فاروق زہری نا خلنگ و بندغی حق آتا باسک ایمان مزاری نا دزگیری نا کیس آک کُھل پانک ئنا رپورٹ ئٹی اوار کننگانو۔
پانک ئنا نیمہ غان شِنگ کروکا رپورٹ نا رد ئٹ پاکستانی لشکر اگست 2023 ئٹی 64 بندغ ئے بیدس عدالت آن زورانسری ئٹ بیگواہ کرینے۔ ہنوکا تو ئٹی 57 بندغ ئے جبر ئٹ بیگوا کننگا۔ پانک ئنا رد ئٹ جولائی 2023 ئٹی جبر ئٹ بیگواہی تا رد ئٹ سخت اِنگا تو پاننگانے ولے اگست 2023 ئٹی بیگواہ مروکا تا کچ مُست آن زیات ءِ۔
رپوٹ نا رد ئٹ چاننگک کہ حالیت آک دے پہ دے زیات خراب مننگ ءُ و پاکستانی لشکر و ریاست نا پالیسیک جبر ئٹ بیگواہی تے کم ئنا جاگہ غا بھاز کننگ ءُ ۔بروکا وخت ئکن دا بھلو بندغی بحران ئس ودی کرو۔
رپورٹ نا رد ئٹ پاکستان آ معاشی دباؤ زیات مننگ و پیشن نا سرمایہ کار خاص کر چین ئنا سوب آن پاکستان بلوچستان نا وسائل آتے لُٹ و پُل کننگ کِن پین شریک دار پٹنگ ءِ۔دادے سہُبمند کننگ کن اودے بلوچ راجی جُہد ءِ ختم کننگ خواہِک ہندا سوب آن او چین ئنا کُمک ئٹ بلوچ راجی جُہد ءِ ختم کننگ کن زوراکی کننگ ءِ۔
پانک ئنا رد ئٹ مکران ڈویژن ہراڑے چین و پاکستان نا اقتصادی راہداری پروجیکٹ(سی پیک)ءِ ہندا ڈویژن پاکستانی لشکر نا اولی نشانہ ءِ ، ہراڑے جبر ئٹ بیگواہی تا 22 کیس رپورٹ مسُنے۔
اگست 2023 لشکر کشی نا رد ئٹ ہم بلوچستان نا زی آ کُبین تمانے۔ ضلع کیچ ئنا تحصیل تمپ ئنا گیشتر ہند آک خیر آباد ، ہوت آباد ، بالیچہ و ناصر آباد ئٹی پاکستان لشکر زیات لشکر کشی کرینے ، بندغ آتے دزگیر کننگ و تشدد آن پد یلہ کننگ نا کیس آک مونی بسُنو۔
غلام فاروق ولد محمد وارث ءِ 27 اکتوبر 2022 ئٹی مستونگ آن زورانسری ئٹ بیگواہ کننگاسَس، اُونا جون ءِ 31 اگست 2023 آ کلی قمبرانی روڈ آ بِٹنگا۔ غلام فاروق نا دزگیری و خلنگ بلوچ نسل کُشی نا بشخ ءِ ۔بلوچ نسل کُشی نا پالیسی ءِ توننگ کِن تانکہ جہانی ادارہ آک پاکستان نا زی آ زور شاغتَنو پاکستان تینا نسل کُشی نا پالیسی آن مُر مفرو۔ دا معاملہ آتیکِن جہانی عدالت انصاف کن پاکستانی لشکر نا زی آ جہانی عدالت ئٹی انسانیت نا برخلاف مقدمہ چلائفے، انتئے کہ پاکستان نا عدالت آتیٹی پاکستانی لشکر نا برخلاف ہچو کیس ئس مننگ کپک۔
رپورٹ نا رد ئٹ ہنوکا تو کیچ ئنا بھلا شہر تربت ئٹی لینگویج ٹیچر عبدالرؤف برکت ءِ توہین ِ مذہب نا دروغ آ الزام ئٹی خلنگا ، نصیر آباد ئٹی با اثر آ بندغ آک زمیندار امداد جویو ءِ خلکُر ، پدا دے کہیئلنگی بلوچستان نا ہند ایران شہر ئٹی مہاجر مروکا سمیر و رخسانہ ( ھانی بلوچ) نا بیگواہی و خلنگ آن پد جون آتے ہُشنگ بلوچستان ئٹی پاش ءُ تدینی ءُ۔داڑان بیدس بندغی حق آتا باسک و زورانسری بیگواہ مروکا بلوچ آتیکن توار بُڑز کروکا وکیل ایمان مزاری نا دزگیر کننگ پاکستانی لشکر نا نیمہ آن اسہ تڑی ئسے کہ بلوچ آتیکن ہچو توار ئس بُڑز مف۔ دا کُل تدینی تا پانک سخت انگا لوز آتیٹی مذمت ءِ کیک۔
