ریڈیو زْرمبش براہوئی | ریڈیو زْرمبش براہوئی,Balochistan-rains

بلوچستان ٹی پر و ہار ئنا بھس کاریک برجاء ءُ۔ لسبیلہ، ڈیرہ بگٹی، پنجگور، مستونگ، دالبندین و ساکران ٹی زالبول و پاڷ اُڑوکا چنا تون اوار پین 12 بندغ دیر ئٹی ٹُبیسہ بیران مسر۔

دالبندین نا ہند چارسر آن خڑک کپوک نا ہند آر سی ڈی کسر آ ٹوڈی کار ئسے ہار ئنا دیر درے۔ ننکان خاہوت، علاقہ نا بندغ آک و اسسٹنٹ کمشنر دالبندین و لیویز کارندہ غاک آر سی ڈی کسر آن یک و نیم کلو میٹر مُر ہنوکا کار الاخ ءِ کشیسہ اوڑان عبدالشکور نا جون ءِ کشار۔

ڈیرہ بگٹی نا تحصیل پھیلاوغ ٹی ترند آ پر تیان گڈ جھل تیٹی طوفان نا سوب کنہال جھل نا سیلابی دیر ٹی یک و نیم سال نا چنا ئس ٹبیسہ بیران مس۔

لیویز کالخواہ تا رد ئٹ ڈیرہ بگٹی نا تحصیل پھیلاوغ ٹی ترند آ پر تا سوب آن کنہال جھل ئنا دیر ٹی لمہ نا دو تیان یک و نیم سال نا چنا تما و دیر دریتہ و پدان علاقہ ہندیک چنا نا جون ءِ دیر آن کشار۔

چنا نا چاہنداری یک و نیم سالی گواران ولد بجار امیر زئی مسوری بگٹی نا پن ئٹ مسونے ہرا پھیلاوغ نا ہندی اس ئس۔ اندن ایلو پارہ کنڈ آ اسہ وڑ ترند پر مننگ نا سوب آن کنہال ڈیم ئنا اسپیل ویز ءِ بھاز نسخان رسینگانے ہرا نا سوب آن ڈیم نا رکھوک بند آتیان دیر ئنا وہنگ بناء مس۔