تمن گورشانی نا مخلوک پاکستانی لشکر نا زوراکی آن پد ہم میزائیل ٹیسٹ ئکن تینا خلک آتے خالی وے کننگ نا اسہ جوانو و جرات مند او فیصلہ ئسے۔ مدامی کِن ہند ئے قوضہ کننگ اسہ بلو دھوکہ ئسے ، بلوچ مخلوک ئے ہُشار مروئی ءِ۔ پاکستان اَسہ چم باز ئسے دا ہر وخت جہان ئے دھوکہ ٹی تخانے و تینا جند ئنا فائدہ تیکِن انسانیت نا برخلاف کاریم کرینے۔ دا ہیت و گپ آتے بلوچ نیشنل موومنٹ نا چیئرمین ڈاکٹر نسیم بلوچ تینا اَسہ درشان ئسیٹی پارے۔
او پارے کہ پاکستانی لشکر راجن پور نا علاقہ تمن گورشانی ٹی ماڑی ، موضع کروزان ، دراڑتل ، موضع چمبڑی ، موضع لوٹ لڑ ، شم ، کلچاس و ریکانی گھور ئٹی ہندی بندغ آتے پارینے کہ اوفک عیلاقہ ئے خالی کیر کہ نن داڑے تینا ایٹمی میزائل آتا تجربہ تے کینہ ۔بلوچستان نا زی آ پاکستانی ریاست قوضہ کرے کہ دانا وسائل آتیان تینا فوجی ضرورت آتے پُورو کے و پنجاب نا دیمروی کِن خڑچ کے داڑن بیدس او بلوچستان ئے ایٹمی سلاہ آتا جوڑکننگ و ایٹمی دھماکہ آتا تجربہ کن جاگہ ئس جوڑ کرینے۔
دا ہند آک یورینیم نا خطرناک انگا کان کنی نا سوب آن تابکاری نا اثرات آتا گواچی ءُ و داسا ہڑدے زیات خطرناک انگا سلاہ تا تجربہ تا ذریعہ ئٹ عیلاقہ نا ہندی آبادی ئے خالی کننگ کِن زور شاغِنگ ئٹی ءُ تانکہ دا جاگہ نا وسائل آتے قوضہ کے۔
او پارے کہ بلوچستان نا دا عیلاقہ آتیٹی یخ زیات مسُنے و پاکستان نا ریاست خواہک کہ مخلوک بیدس کمک ، مناسب او جاگہ نا بست و بند و واپس بننگ نا ضمانت آن ہند ئے خالی کے۔ داکان بیدس دا خُلیس تینا جاگہ آ راست ءِ کہ اگہ مخلوق عیلاقہ ئے خالی کرے پدا واپس اوفتے النگ مفرو۔ اوفتا اُرا و مال دلوت آتے قوضہ کننگو اوفک مدامی کِن درپدری نا زند تدیفِنگ کِن مجبور مرور۔ ہندا سوب آن مخلوک تینا جاگہ آتے ہچ وڑ النگ خواہپک۔
ڈاکٹر نسیم پارے کہ 2018 ٹی پاکستانی لشکر پواد کوہ ( کوہ ء پواد ) نا خُڑک انگا علاقہ تیٹی تینا میزائل نا تجربہ تے کریسس ہموفتا نشان آک بارگ پواد ، مرنج ، گزبوڑ ، دراگل ماڑی ، کلیری تل ، ساوڑی گھور و جوپ پواد نا آبادی تیٹ اریر ۔ اینوہم دا علاقہ آتے تجربہ نا جاگہ جوڑ کرینو ہراکان ہندی بندغ آبادی آتے تاوان رسینگ ءِ۔
او پارے کہ 6 اکتوبر آ ڈیرہ غازی خان ئٹی اَسہ تراک ئس مس ئس۔ ہندی میڈیا رپوٹ نا رد ئٹ دا تراک ڈیرہ غازی خان نا “جوہری تنصیبات آتا خُڑک آ مسُنے۔ اوکان پد ہند ئنا انٹرنیٹ و رابطہ نا نظام ئے بند کننگا۔ پاکستانی میڈیا دا تراک ئے پاکستانی حکمران آتا بیان تا رد ئٹ مونی ہیس کہ دا پاکستانی ائیرفورس نا فائٹر جیٹ آن ودی مروکا “سونگ بوم” مسُنے ۔ولے دا ہیت ئنا نا ہچو ثبوت ئس اف کہ آخر او ہرا خطرہ نا حالیت بسس کہ پاکستان نا ایف 16 , ایف 17 یا جے 10 نا وڑ انگا سپر سونگ ایئر کرافٹ مُچ قانون آتا خلاف ورزی کریسا شاری آ آبادی تا زی آن توار نا رفتار آن تیز بال کرفِنگیک۔ 6 اکتوبر نا تراک اسہ ڈھکوک ءُ تراک ئس اس جہانی ادارہ آتے دا رد ئٹ پٹ و پول کروئی ءِ انتئے کہ پاکستان مُست ہم ایٹمی سلاہ تا بابت ہیت آتے ڈھکانے و پین ایٹمی سلاہ جوڑ کننگ ءِ۔ داسا ہم دا دروغ ئنا پد آ بھلو راستی ئس ارے ہرا دا خطہ و جہان کِن تباہی یا بے چاڑی نا سوب ئس جوڑ مننگ کیک۔
بی این ایم نا چیئرمین پارے کہ ڈیرہ غازی خان و راجن پور بلوچستان نا علاقہ آک ءُ۔ بی این ایم تون اوار بلوچ راج او جاگہ نا مخلوق تون اوار ءِ و اوفتا برخلاف مروکا ہر وڑ ئنا چم آتے آ چُپ مفرور و اوفتوں ہر وخت اسہ جاگہ آ سلوک مرور۔
