بلوچ نیشنل موومنٹ بی این ایم نا چیئرمین ڈاکٹر نسیم بلوچ اقوام متحدہ نا ہیومن رائٹس کونسل نا 54 می مجلس تون تران کرسا پارے کہ پاکستانی لشکر آتا کنڈ آن بلوچستان ئٹی بندغی حق آتا سخت لتاڑ آ دمدستی پام تننگ مرے۔
ترقی نا حق تون اوار غٹ بندغی حق، شاری، سیاسی، اقتصادی، چاگڑدی، و دود ربیدئی حق آتا شونداری و رکھ آ لس تران نا وختا، ڈاکٹر نسیم بلوچ بلوچ الس ئنا بیم تروک حالیت آ زور شاغا۔ او پاکستانی لشکر نا دو آن بلوچ نسل کشی نا بارو ئٹ پارے، ہراٹی زوراکی نا بیگواہی، خون، بےدادی، دہشت زدہ کننگ، و اُرا تا بھس کاری اوار ءِ، ہرافتے بلوچ الس ہڑدیئی بنداو آ سگنگ ءِ۔
بی این ایم نا بندغی حق آتون تفوک ادارہ پانک نا حوالہ ترسا ڈاکٹر نسیم بلوچ بلوچستان ئٹی بیم تروک بندغی حق آتا حالیت آ پام تننگ کن کچ و حساب ئے ہم پارے، او پارے کہ بیرہ اگست ئٹی بلوچستان ئٹی 64 زوراکی نا بیگواہی و مُسہ خون ئنا تدینی ریکارڈ مسنو۔ اوکان گڈ او منَہ خاصو کیس ئنا بارو ئٹ ہیت کرے ہرا بلوچ قوم ئنا بیم تروک حالیت نا مثیل ءُ۔
ڈاکٹر نسیم بلوچ برجاء سال 28 اگست آ مروک ہندا زوت ئنا اسہ ویل ئسے آ پام ترفے ہراٹی نور خاتون پنی او اسہ زالبول ئسے اونا اِرا چُنا تون اوار بلوچستان نا بنجائی شار شال ئٹی شش دے اسکان بیدس عدالت دزگیر تخنگا، بیگواہ و بےدادی نا گواچی کننگا۔
تینا تران نا ایسر ئٹی او بلوچستان ئٹی بندغی حق آتا اسہ وڑ مروک و بیم تروک لتاڑ نا بارو ئٹ دمدستی پام و کارروائی نا خواست آ زور شاغا۔
او پارے کہ پاکستانی لشکر بنگلہ دیش نا وڑ بلوچستان ئٹی ہم جنسی زیادتی کرینے۔ اسہ زالبول ٹیچر نجمہ ہندا سال 15 مئی آ فوج ئنا کنڈ آن جنسی ہراسانی نا سوب آن خودکشی کرے۔
اپریل 2021 ٹی، فوج بلوچستان نا علاقہ ہوشاپ ئٹی 13 سالی خوانندہ مراد امیر تون جنسی زیادتی کرے۔
آواران نا ہندی نور جان 20 مئی 2021 آ پاکستانی فورسز نا دباؤ تیان ساہ ئے ہلک، پاکستانی لشکر اوفتیا زور شاغاسس کہ او تینا مسڑ ئے فوجی کیمپ آ ہتے۔
برجاء سال 28 اگست ننکان نور خاتون پنی او زالبول ئسے دزگیر کرسا بیگواہ کننگا و شش دے اسکان او تینا اِرا چُنا تون اوار بےدادی تا گواچی کننگا۔
او پارے کہ دا زوراکیک اسہ وڑ برجاء ءُ، داڑا دمدستی پام تننگ و کارروائی نا ضرورت ءِ۔
