بلوچ اسٹوڈنٹس آرگنائزیشن نا بنجائی جارکش تینا شینک مروکو اسِہ درشان ئسے ٹی پارے کہ بی ایس او نا کُنڈ آن مستونگ ئٹی اسِہ دی ئی“ ساراوان ایجوکیشنل، لیٹریری اینڈ پولیٹیکل فیسٹیول” شہید منظور بلوچ نا پِن ءَ اڈ تِننگا ہرا ٹی بست و بند نا زمہ واری تے مستونگ زون و اسٹیج سیکریٹری باقر بلوچ، شہلا منظور ءُ صائمہ عزیز اواری ئٹ ایسر کریر۔ دا فیسٹیول ئٹی کماش بی ایس او و بلوچستان اسمبلی نا باسک آک، ڈگری کالج مستونگ نا پروفیسرز، سیاسی سروک، نیاڑی استاد ءُ خوانندہ آک اوار ئسر۔
جارکش پارے کہ ساراوان ایجوکیشنل، لیٹریری ءُ پولیٹیکل فیسٹیول نا بندات ءِ ڈگری کالج نا پروفیسر صالح محمد شاد، چیرمین بی ایس او جہانگیر منظور بلوچ، بی این پی نا مسکوہی بُنجاہی کمیٹی نا باسک عبدالرحمان خواجہ خیل و بی این پی نا بنجائی ایگزیکٹو کمیٹی نا باسک ڈاکٹر اسماء منظور بلوچ فیت ءِ تڑِسہ کریر۔ چیرمین بی ایس او جہانگیر منظور بلوچ، ڈگری کالج مستونگ پروفیسر صالح محمد شاد، بی این پی نا ہندی سیکریٹری جمیل بلوچ و بی ایس او مستونگ ہنکین نا اسرار بلوچ فیسٹیول نا مسخت و اہمیت نا بابت ئٹ تران کریر۔
فیسٹیول ئٹی تعلیم آ ڈنی اسر نا سرحال آ پینل ڈسکشن بندات مس، ہرا ٹی ناظم نا فرض آ فہد آصف بلو چ مس اونا پینلسٹس مسکوہی پرنسپل ایلیمیٹری کالج مستونگ میر عبدالطیف بنگلزئی، حرا اسکول نا بانی عبدلعابد و پرنسپل ڈگری کالج خضدار نا ڈاکٹر سلیم جاوید و پروفیسر قدیر ئسر۔
او پینل ڈسکیشن ئٹی National Question of Balochistan نا سرحال آ ہیت مس ہرا ٹی ناظم نا ذامہ دار بی ایس او نا بنجائی کمیٹی نا باسک سید عدنان شاہ بلوچ ایسری تسر و مہمان اسپیکر ئٹی نیشنل پارٹی نا بنجائی سینیئر نائب صدر میر کبیر محمد شئی بلوچستان نیشنل پارٹی نا بنجائی کمیٹی نا باسک ایم پی اے خاران ثناء بلوچ، بلوچستان نیشنل پارٹی ( عوامی) نا بنجائی انفارمیشن سیکرٹری ڈاکٹر ناشناس لہڑی و بلوچ اسٹوڈنٹس آرگنائزیشن نا مسکوہی بنجائی سیکرٹری جنرل منیر جالب بلوچ اوار ئسـ
فیسٹیول ئٹی، ورنا تا موہکشی و اُفتا ذمہ واری تا سرحال آ پینل ڈسکشن نا بناء کریر ہرا ٹی ناظم نا ذامہ واری تے عاطف بلوچ ایسری تس ہرا ٹی بی ایس او (پچار) نا بنجائی کماش زبیر بلوچ، پروفیسر جیئند ساجدی، بی این پی نا سروک میر سراج لہڑی و ورنا تا موہکش میر بلوچ خان تینا خیال آتا درشانی ءِ کرے۔
نیاڑی تا تعلیمی، سیاسی و چاگڑدی کڑد ئنا رد ئٹ کانفرنس ئٹی پینل ڈسکشن نا بست و بند مس ہراٹی ناظم نا زمہ واری تے ڈاکٹر محسن جمیل ایسری تس ہراڑن بی این پی نا بنجائی کمیٹی نا باسک جمیلہ بلوچ، اسماء منظور بلوچ، بی این پی نا راہشون ایڈووکیٹ فریدہ بلوچ و یوتھ ایکٹیوسٹ نمرہ پرکانی خیال آتا درشانی ء کریر۔
کانفرنس ئٹی بی ایس او نا مسکوہی لیڈر آتتون اوار جتا سیاسی پارٹی، خونندہ گل و جتا تپہ آتیان بروک آ فکر آتتون تعلقداری تخوکا بندغ آک ہم اوار مسر۔
جارکش پارے کہ ساراوان ایجوکیشنل، لیٹریری و پولیٹیکل فیسٹیول نا ایسر ئٹ مہمان آتے گل ئنا نیمہ غان انعامی ٹرافی تننگانے و شاعری نا انتظام ہم مسس ہراٹی ناظم نا زمہ واری تے باقر بلوچ ایسری تس ہرانا صدارت ءِ حاجی شاہ بیگ شادائی کرے اندن میر عبد الطیف بنگلزئی اہم انگا مہمان ئس۔
شاعر آ تیٹ براہوئی بولی نا پنی آ شاعر حمید عزیز آبادی، فیض بولانی، سید غریب شاہ، و طاہر الزمان تینا کلام آتے خوانار۔ اسہ دے ئنا فیسٹیول ئٹی گل ئنا " علم ئنا چراغ" تحریک نا رد ئٹ بک اسٹال نا ہم بست و بند کننگاسس اندن گرلز ڈگری کالج و جتا اسکول آتا خوانندہ آک تینا آرٹ آتے نشان تسر، داڑان بیدس پینٹنگ و فوٹوگرافیک ہم نشان تننگار۔
