بلوچ نیشنل موومنٹ نا شنگ کروک بیان نا رد ئٹ تربت ریفرنس ئٹی تران کرِسہ پارٹی سروک آک پاریر کہ 13 نومبر سن 1839 دیہاڑ نا ہمو تدینی ءِ کہ دا دے آ انگریز سامراج بلوچ سرزمین آ ارش کرے۔ داکان مُست بلوچستان آزاد اس و بلوچ قوم خودمختار اس۔
بیان ئٹی پاننگا کہ بی این ایم نا شہید سلیمان آرگنائزنگ باڈی تربت ئٹی ریفرینس، بلوچ شہید آتا دے ئنا رد ئٹ اڈ تننگا۔
ریفرنس ئٹی بی این ایم تربت نا جتا یونٹ آتا باسک آک ہم اوار مسر۔ بی این ایم نا باسک آک شہید آتے دروت ندر کرِسہ اوفتا کڑد ئے بلوچ قومی تحریک کن بھاز اہم پاریر۔
پروگرام ئٹی 13 نومبر نا دیہاڑی پد ندارہ، انگریز آتا بلوچ سرزمین آ کوزہ نا بھاز انگا زہم آتیا تران کننگا۔ اوار مروکا پاریر کہ انگریز سامراج بلوچ سرزمین آ کوزہ کننگ خواہتوکہ۔ دا اوفتا مفاد ئٹی الو کہ او بلوچستان آ کوزہ کیر بلکہ اوفتا تزیرواتی مفاد آک بلوچ سرزمین تون تفوک اسر۔ ہندا سوب آن او خان بلوچ آن خواست کریر کہ او انگریز آتے بولان پاس آن گدرینگ نا موکل ایتر تانکہ او داڑے رکھوک وڑ ئٹ گدرینگِسہ اوغانستان آ جلہو کیر۔ ولے مزاحمت نا چیدہ خان بلوچ دا ہیت ئے منیتو کہ بلوچ سرزمین اوفتا ہمسایہ نا برخلاف کارمرز مرے۔ تینا قومی خودمختاری و شرف کن خان بلوچ انگریز آتون مون پہ مون بس و تینا سنگت آتون اوار جنگ کرِسہ شہید مس۔
او پاریر کہ بلوچ ہر زمانہ ٹی سامراجی تاغت آتا مونا مزاحمت کرینے و داسکان اوفتا مفاد آتا مونٹی ہڑاند ئس ءِ۔ انگریز نا زمانہ آن ہلیس پاکستان کون آ مصنوعی ریاست نا کوزہ نا زمانہ اسکان بلوچ تینا بقاء و قومی خودمختاری کن مزاحمت کننگ ءِ۔ شرفدار و با وقار قومی زندگی کن شہید مروکا بلوچ آتا لڑ بھاز بھلن ءِ۔ دا دے بیرہ بلوچ شہید آتے یات کننگ کن اف بلکہ اوفتا نظریہ غا تے، مقصد و فکر ئے مونا دننگ کن عہد نا ہم دے ءِ۔ دا دے بلوچ فرزند آتے قومی شرف و شان کن مزاحمت کننگ نا پنت ایتک۔ دا دے آزادی کن مزاحمت آ یخین ئے سوگو کیک۔ اگہ اینو بلوچ قومی تحریک برجاء ءِ تو دا نا بھلا سوب بلوچ شہید آتا خون و شرفدار آ کاٹم تا قربانی ءِ۔ اندن کہ عظیم شاعر مبارک قاضی پائک کہ “ دتر نا دا سیلاب کُل پلیت و گند آتے صاف کرو۔”
