بی این ایم تینا اسہ شنگ کروک پریس ریلیز ئسے ٹی پارینے کہ بلوچ شہید آتا دے ( سینزدہ نومبر ) آ بلوچ نیشنل موومنٹ ( بی این ایم) نا باسک آک تیبہ جہان ئٹ جتا جتا پروگرام اڈ ایتور۔
بیان ئٹ پاننگا کہ بی این ایم نا پیشن ڈیہہ تا ہنکین و ڈیہہ ئنا تہٹی ہنکین آتا رد ئٹ دا پروگرام آتیٹ بلوچ تحریک آزادی نا ایجنڈہ آ بلوچستان ئٹی بندغی حق آتا حالیت ئے مونا ہتنگ مرو۔ و ’بلوچ شہید‘ آتا ویب سائٹ و چاگڑدی حوالکاری میڈیا نا پنّو( پیج ) آتیا آنلائن کمپئن مرو۔
او پارے کہ بی این ایم نا کنڈ آن بلوچ شہید آتا ویب سائٹ، ایکس، فیس بک، انسٹاگرام و ٹیلی گرام اکاؤنٹ آن یک نومبر آن ہلیس 13 نومبر اسکان ہڑدیئی بنداو آ معلومداری شنگ کننگو۔
بی این ایم نا ترجمان پارے کہ پاکستان بلوچ قومی تحریک ئے لتاڑنگ و بلوچ قوم ئے آجوئی آن پد بٹنگ کن ہزار آ تا کچ ئٹ بلوچ آتے شہید کرینے۔ دا دے ہمو شہید آتا قربانی تے اُستا شاغک ہرا بلوچ قومی آزادی کن تینا ساہ تے ندر کرینو۔
اونا پاننگ اس کہ 13 نومبر نا دے نہ بیرہ ہمو شہید آتا قربانی تے مخلوق نا مونا ہتیک ہرا ’سرزمین بلوچستان ‘ نا آجوئی کن برطانیہ نا جلہوکار تتون مون تسر بلکہ دا دیہاڑ ئے ہم راست کسر آ تخک۔ 13 نومبر 1839 آ انگریز آک آزاد ڈیہہ بلوچستان آ جلہو کریر و بلوچستان نا خان ’ لال شہید محراب خان ‘ ئے سنگت آتون اوار شہید کریر۔ او دے بناء اس، ہراکان گڈ انگریز سامراج بلوچستان آ کوزہ کرسہ اودے ٹُکر کرے۔ اگہ 13 نومبر نا تدینی متوکہ تو اینو بلوچستان نا دیہاڑ پین مسکہ۔ داکان مُست اسہ دیمروی کروکو ڈیہہ ئس اسک ہرا نا بست و بندی کاریمک پوسکنو دروشم ہلنگ اسر۔
بی این ایم نا ترجمان پارے کہ ہچو قوم ئس پین قوم آتے غلام تخنگ کپک۔ قوم آتا نیام ئٹ سیالی اواری نا بقاء، برابری و اسٹ ایلو نا آجوئی نا شرف تخنگ آن مریک۔ نوآبادیاتی تاغت آک بیرہ ریاستی تاغت نا ذریعت ئٹ ایلو قوم آتے غلام کپسہ بلکہ دا نظام بالادست و محکوم قوم آتا نیام ئٹ پھاشو لیک ئس کشیک۔ ہمر انگریز سامراج نا دور ئٹ انگریز آک ہندی بندغا تے و اوفتا دود ربیدہ آتے تینے آن شیف خلکُر اینو ہم اندا بست و بند ئٹی محکوم قوم آتون ناروائی نا روشت تخنگک۔ ننا بولی و دود ربیدہ ہم بالادست قوم آتیکن مزاحمت کار ءِ اندا سوب آن او دافتیان مرّی تخک و اوفتا ایسری یا مسخ کننگ نا کوشست کیک۔
او پاریر کہ پنجاب ئٹی بلوچ خوانندہ آتون ریاستی و السی سطح آ ہرا روشت تخنگک او بالادست قوم آتا نفسیات نا عکس ءِ بلوچ قوم نا گٹ خلاصی نا اسٹ انگا کسر بلوچ قوم ئنا آجوئی ءِ۔ آجوئی کن قربانی المی ءِ، ننے تینا شہید آتا کسر آ گھام خلِسہ تحریک آزادی نا سرسوبی کن تینا کسر آ مزل نا دوئی مننگ اسکان سلوئی تمو۔
