بلوچ نیشنل موومنٹ یوکے چیپٹر نا کنڈ آن کوزہ مروک بلوچستان ئٹی پاکستانی لشکر و ڈھکوک ایجنسی تا شیف کاریم کروک پن ئنا کاونٹر ٹیررازم ڈپارٹمنٹ (سی ٹی ڈی) نا دو آن بلوچ ورنا تا زوراکی نا بیگواہی و بیدس عدالت کھسفنگ نا برخلاف برطانیہ نا شار لندن ئٹی ٹریفلگر اسکوائر آ برانز کننگا۔
برانز ئٹی بلوچ نیشنل موومنٹ یوکے چیپٹر نا باسک، واکدار و بلوچ کمیونٹی یوکے تون اوار چُنا نیاڑیک بھلو کچ ئسیٹی اوار مسر، برانز ئٹی اوار مروک باسک آک بینر و پلے کارڈ ہرفیسُر ہرافتیا اندا زوت ئٹ سی ٹی ڈی نا دو آن زوراکی ئٹ بیگواہ کننگوک ورنا تے بے دڑدی ئٹ بیدس قانود کھسفنگ نا برخلاف نعرہ لکھوک اس۔
دا وختا برانز کروکا کوزہ گیر پاکستانی لشکر و سی ٹی ڈی نا زوراکی تا برخلاف سخت نعرہ خلکُر و چھار دے مُست دروغ ئنا مونتس ئٹ خون مروک بالاچ مولابخش، ودود بلوچ و سیف بلوچ تون اوار ایلو خون مروک آتیکن انصاف نا خواست کننگا۔
برانز ئٹ اوار مروکا تتون تران کرسا بی این ایم نا جونیئر جوائنٹ سیکریٹری واجہ حسن دوست بلوچ کوزہ مروک بلوچستان ئٹی کوزہ گیر پاکستانی لشکر و اونا شیف آ کاریم کروک ادارہ سی ٹی ڈی نا دو آن بلوچ ورنا تا زوراکی نا بیگواہی و خون ئنا سخت مذمت ئے کرسا پارے کہ سی ٹی ڈی ہرا زوراکی تا چرجوئی ئے بلوچ قوم و خاص وڑ ئٹ بیگواہ مروک بلوچ آتا بر خلاف بناء کرینے جہان ئٹ ہچو جاگہ سے آ دانا مثیل دو بفک۔
او پارے کہ دروغ ئنا مونتس ئٹ خلنگوک بندغ آتا ہچو ادارہ سے تون تعلقداری الو و بالگتر ئٹ دروغ ئنا مونتس ئے پاس کننگ کن اندا بھاز ءِ کہ بمب تراک ئٹ خون مروک بندغا تا دوک تفوک اسر۔
برانز ئٹ بلوچ ہیومن رائٹس کونسل نا سروک صمد بلوچ تران کرسا پارے کہ بالاچ مولابخش ئے عدالت ئٹ جج ئنا مونا ہتنگ و دہ دے ئنا ریمانڈ ہلنگ آن گڈ ہم کھسفنگا، ہرا سی ٹی ڈی نا ہیت آتا نفی ئے کیک۔بلوچستان ننا ڈیہہ ءِ ہراڑا نن آجوئی و شرف ئٹ زند کننگ خواہنہ۔
برانز ئٹ اوار بلوچ ری پبلکن پارٹی نا سروک منصور بلوچ تینا خیال آتا درشانی کرسا پارے کہ بلوچ ورنا تے عداکت ئٹ ہتنگ آن بیدس خون کننگک۔ برطانیہ نا الس برطانیہ نا پارلیمان و کالخواہ تیان خواست کے کہ او بلوچ قوم آ برجاء پاکستانی زوراکی تا نوٹس ہلِسہ بلوچ نسل کشی ئے توننگ ئٹ تینا کڑد ئے سر تے۔
