وال اسٹریٹ جنرل تینا رپورٹ ئٹی دا منصوبہ نا بارو ئٹ چاؤکا بندغ آتا بارو ئٹ پارے کہ سعودی عرب پاکستان ئٹی کینیڈا نا بیرک گولڈ نا کنڈ آن ہشت ارب ڈالر نرخ ئنا تیار کروک بھلا کان ئے بہا ئٹ ہلنگ نا ہیت کننگ ءِ۔
وال اسٹریٹ جرنل تینا رپورٹ ئٹی پارے کہ ریکوڈک کان بیرک گولڈ و حکومت بلوچستان نا اوڑدئی ٹی ءِ ہرا پاکستان نا اسہ مُر ءُ علاقہ ئسے ٹی ءِ۔
ریکوڈک کان ئے فی الحال اسہ مرغنو قانودی جنگ ئسے آن گڈ بیرک گولڈ نا کنڈ آ تیاری مننگ ءِ۔
رپورٹ ئٹی کالخواہ و چاؤک آتا باروئٹ پاننگا کہ سعودی عرب کان کنی نا وارخواہی ٹی کُل آن زیات دلچسپی تخک و متحدہ عرب امارات کشت و کشار، صاف توانائی و لاجسٹکس آ کُل آن زیات پام تننگ ءِ۔
امریکی خبر تروک وال اسٹریٹ جنرل نا رپورٹ نا رد ئٹ پاکستان ارب آ ڈالر تا سرمایہ کاری ہتنگ کن خلیجی ڈیہہ تتون ہیت ءُ تران کننگ ءِ انتئے کہ پاکستان تینا معیشت ئے سوگو کننگ خواہک۔
رپورٹ ئٹی ودیک پاننگا کہ پاکستان تیل نا مڈی آ مالا مال خلیجی حکمران تے تینا معیشت ئے گچین کننگ کن سرمایہ کاری نا کنڈ آ دننگ ءِ ہرا نا اسہ مسخت ڈنی ملکی کرنسی ئے ڈیہہ ئٹ ہتنگ ءِ۔
رپورٹ ئٹی دا ہم پاننگا کہ پاکستان و خلیجی کالخواہ تا رد ئٹ پاکستان ئٹی سعودی آئل ریفائنری تا ٹہفنگ کن ہیت ءُ تران تینا ایسر اسکان سر مسنے ہراڑا 14 ارب ڈالر لگّنگ کیک۔
