شال: پہ زوربیگواھیں مردمانی پد جنگ ءَ وی بی ایم پی ءِ گدان ءَ 5684 روچ سرجم بوتگ۔ دوشمبے ءِ روچ ءَ بی ایس او پجار ءِ گوستگیں سرکماش زبیر بلوچ ءُ آدگہ گوں زوربیگواھیں مردمانی کھولاں پہ ھمدردی درشان کنگ ءَ گدان ءَ آتکگ اَنت۔
وی بی ایم پی ءِ کمک سرکماش ماما کدیر بلوچ ءَ گوں مردماں تران کرتگ ءُ گوشتگ کہ درساں گیش ورنا ءُ نودربر زوربیگواھی ءِ نشانگ کنگ بوگ اَنت آ سپر ءِ تہ ءَ بہ بنت یا کہ وانگی ادارھانی تہ ءَ زوربیگواہ کنگ بنت۔
آئی گوشتگ کہ ازم ءِ استھکام آپریشن ءِ جار ءِ جنگ ءَ پد بلوچستان ءَ پاکستانی لشکر ءِ کاروائیانی تہ ءَ گیشی آرگ بوتگ۔ مردمی ھکانی جاور ھال ھراب بوتگ اَنت۔ درکانودی زوربیگواھی ءُ بندیگجاھاں زوربیگواھیں مردمانی آزار دیگ ءُ آیاں شھید کنگ ءَ مردمانی دل ءَ گیش ترس ودی کرتگ۔
آئی گوشتگ کہ بلوچستان ءِ کنڈ کُنڈ ءَ کھول پہ وتی زوربیگواھیں مردمانی آجوئی ءَ دگانی سر ءَ درکپتگ اَنت زھرشانی کنگ ءَ اَنت۔ انتزامیہ زھرشانی کنوکانی لوٹانی گوشدارگ ءِ بدل ءَ آیاں گیش ترسینگ ءُ بے توار کنگ ءَ زوراکی ءِ نشانگ کنگ ءَ اِنت۔
آئی گوشتگ کہ گْوادر ءِ میتگ پانوان پاکستانی لشکر ءَ گوستگیں شپ ءَ انگر کرتگ ءُ داں انوں کم چہ کم ھشت مردم آوار جتگ کہ آیانی نام سمید، زھیر ء ھسن، امران ء مھمد، ھسن ء ازیز، پیر جان، لیاکت سروزی ءُ آئی زھگ اِنت۔
آئی گوشتگ کہ زریپ ء اُمر ءُ نوید ءِ ناھک ءَ کشگ ءَ پد کلات ءَ ابدُلھلیم ء گلام مھمد جھمنند ھزینہ آزار جاھاں کشگ بوتگ۔ آیانی کھول دگانی سر ءَ انساپ ءِ لوٹ کنگ ءَ اَنت۔
آئی گوشتگ کہ پہ مردمی ھکانی جھدکاراں روچ پہ روچ جاور ھراب بوان اَنت بلے ما اے جاور ھال ءِ دیمپانی ءَ کنیں ءُ زوراکیانی بگیری ءَ توار جست کنیں۔
