لندن : انسانی ھکّانی جھانی روچ ءِ درگت ءَ بلوچ نیشنل موومنٹ ( بی این ایم ) ءَ ماں برتانیا ءِ پارلیمان ءَ نیادے برجم داشتگ ، اے نیاد ءِ مھمانجل برتانیا ءِ پارلیمان ءِ باسک جان میکڈونل بیتگ۔
اے مراگش ءَ گپ جنوکاں بلوچستان ءِ ناگیگیں انسانی ھکّانی جاورانی سر ءَ گپ جنان ءَ گْوشتگ کہ اے زوراکیانی بگیری ءَ میان استمان دلگوش گْور بہ کنت۔ترانکاراں گْوشتگ کہ بلوچ راج ریاست ءِ زوراکیانی دیمپان اِنت، مردم بیگواہ کنگ ءُ کُشگ بیگ ءَ اَنت۔پہ اے زوراکیانی گِر ءُ دار کنگ ءَ میان استمان ءِ کمک ھژدری اِنت۔
برتانیا ءِ پارلیمان ءِ باسک جان میکڈونل ، رچرڈ برگن ، بی این ایم ءِ سرکماش ڈاکٹر نسیم، سمی دین ، ڈاکٹر سبیا ، ڈاکٹر نیسر دشتی ، پھیم ءُ سلیم الاھی تران کُرتگ۔
جان میڈونل ءَ گْوشتگ کہ برتانیا گوں پاکستان ءَ نزیک اِنت، بلے بایدیں کہ بلوچستان ءَ انسانی ھکانی بگیری ءَ بے توار مہ بیت۔آئی ءَ گوں پالیمنٹ ءِ باسکاں زور داتگ کہ آ پہ بلوچ راج ءِ ھکاں سرکار ءَ زور بہ دیئنت۔
بی این ایم ءِ سرکماش ڈاکٹر نسیم دو رند ءَ پاکستانی لشکر ءِ دست ءَ زور بیگواہ بیتگ ، آئی ءَ وتی آزار جاہ ءِ کسہ آؤرتگ اَنت ءُ گْوشتگ کہ پاکستانی آزارجاھاں منی زندگ بیگ ءِ نیمون ایوک ءَ بلوچ ءِ آجوئی جھد بیتگ کہ ھمے اوست ءَ من دُرسیں زوراکی سَگ اِتگ اَنت۔بلے ایوک ءَ من اے زوراکی مہ سَگ اِتگ اَنت بلکیں ھزاراں بلوچ جنین ءُ مردین ھمے زوراکیانیاں سَگگ ءَ اَنت۔بلوچستان یک ھنچیں زمین ئِے جوڑ بیتگ کہ اود ءَ ناشرکاری ءُ تُرس ءِ بادشاھی اِنت ءُ مردم ھمے تُرس ءِ ساھگ ءِ چیر ءَ زندگی کنگ ءَ اَنت۔
بی این ایم ءِ دری کارانی کارگشاد پھیم ءَ زور بیگواھیانی آماچیں کھولانی سر ءَ بیتگیں زوراکی ءُ مدام مردمانی آوار جنگ ءُ زوراکیاں ابید بلوچ راج ءِ آجوئی جھد ءِ برجاہ دارگ ءِ واھگ درشان کُرتگ۔
ڈاکٹر نسیر دشتی ءَ بلوچ راج ءِ ناگیگیں جاور، بلوچستان ءِ گوں پاکستان ءَ زور ءُ ھوار کنگ ءُ چین ءُ پاکستان ءِ گزرانکی راھداری ( سی پیک ) ءِ پارست ءَ چین ءِ ھواری ء سر ءَ گپ جتگ ، آئی ءَ میان استمانی تک ءَ پاکستان ءُ چین ءَ جست کنگ ءِ لوٹ کرتگ۔
بلوچ یکجھتی کمیٹی ( بی وائی سی ) ءِ سروک سمی دین ءَ وتی پت ءِ زوربیگواھی ءَ پد وتی کھول ءِ جھد ءُ پہ انساپ ءَ سر بتگیں کھولانی جیڑھانی سر ءَ گپ جتگ۔ آئی ءَ گْوشتگ کہ اے زوراکیانی بگیری ءَ پہ بلوچ راج ءَ میان استمانی ھم سنتی ھژدری اِنت۔
بی وائی سی ءِ سروک ڈاکٹر سبیا ءَ بلوچستان ءَ مردمانی سر ءَ بیوکیں ناھکی ءُ پرایمنیں کارکنانی سر ءَ برجاھیں زوراکیانی بابت ءَ گپ جتگ ءُ گْوشتگ کہ کہ اے کارانی پُشت ءَ چین زر دیگ ءُ ءُ پلہ مرزی کنگ ءَ اِنت۔ آئی ءَ دمگ ءِ تہ ءَ زوراکیانی پدر کنگ ءَ میان استمانی تک ءَ ’ پترے ‘ ءِ لوٹ کرتگ۔
سلیم الاھی ءَ وتی برات زاھد بلوچ ءِ زور بیگواھی ءِ بارہ ءَ گپ جتگ ، کہ آ یک نودربر راھشونے بیتگ۔ آئی ءَ چہ میان استمانی تک ءَ لوٹ کُرتگ کہ آ بلوچستان ءَ مردمانی زور بیگواھیاں گِر ءُ دار بہ کنت۔
برتانیا ءِ پارلیمان ءِ باسک جیریمی کورین ءَ ماں بلوچستان ءَ بیوکیں زوراکیانی سر ءَ میان استمانی سرپد کنگ پہ چیردستیں راجاں ھمدست بیگ ءِ سر ءَ زور داتگ۔
بی این ایم جان میکڈونل ءُ دگہ پارلیمانی باسکانی منت گپتگ کہ آیاں اے نیاد برجم داشتگ۔
