شال:پہ زور بیگواھیں مردمانی پد جنگ ءَ شدکشیں زھرشانی گدان ءَ 5475 روچ سرجم بوتگ۔ دوشمبے ءِ روچ ءَ بی ایس او پجار ءِ پیشیگیں سرکماش زبیر ءُ پیشیگیں سرکماش گھرام ءُ آدگہ مردم پہ ھمدردی درشان ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءُ پنجاپ ءَ بلوچ نودربر، ورنا، سیاسی باسک، راست گوشیں اھوالکار ءُ جتائیں بھرگاں سیادی داروک ھزارانی کچ ءَ مردم ریاستی لشکر ءُ چیریں ادارھانی دست ءَ آوار جنگ ءُ آیانی ژانگولیں لاش چگل دیگ بوتگ اَنت، بلوچ چکچینی گوں ترندی ءَ برجاہ اِنت۔ اکوام متھدہ ءَ ھوار میان استمانی توانمند اے برجاھیں رستریانی باروا بے توار ءُ نازدزرس اَنت۔
ماما کدیر گوشتگ کہ بلوچ نودربرانی زور بیگواہ کنگ ءَ ابید ریاست ءِ ادارہ آیانی دزگیری ءَ منگ ءَ نہ اَنت۔ زور بیگواہ کنگ بوتگیں نودربرانی کھول پہ انساپ ءَ ٹاپار جنوکیانی گون ءَ رھوت کنگ ءَ اَنت، بلے آیاں دروگیں دلبڈی ءُ بے اوستی ءَ ابید دگہ ھچ نہ رستگ۔
آئی ءَ گوشتگ کہ پاکستان ریاست ءُ آئی پھازداریں زوراک، سیاسی باسک ءُ آدگہ بھرگاں سیادی داروکیں بھرگانی دست ءَ بوت نہ کنت ، اکوام متھدہ ءِ ھما ادارہ کہ آیانی گاگدانی تہ ءَ راجی وتواکی، آجوئی ءُ چہ مردمی ھکانی پاسداری ءَ زانگ بنت آ بلوچستان ءَ نوک آباکاریں زورگپتی ءُ بلوچ چکچینی ءِ شونداتاں مان آرگ ءَ نہ اِنت۔ چہ آیانی اے کرد ءَ انچوش گمان کنگ بیت کہ اکوامتھدہ ءَ نوک آباد کارءِ پہ نپانی پھریزگ ءَ وتی چم بند کرتگ اَنت۔
