بلوچ راجی زْرمبشت( بی این ایم) ءِ پیشگیں کارگشاد ءُ بلوچ سروک رھیم بلوچ ایڈووکیٹ ءَ ماں چاگردی رسانکدر ءِ تندجاہ ایکس ءَ وتی یک درشانے ءَ گْوشتگ کہ بلوچ راج ءِ بگیری ءَ زورگریں پاکستانی ریاست ءِ زوراکی روچ پہ روچ گیش کنان اِنت۔ بلوچ بَچ چہ دھکاں پہ زور آوار جنگ بیگ ءَ اَنت۔ مردم دہ دہ ،پانزہ پانزہ سالاں بیگواہ اَنت۔گْوستگیں چیزے روچ بیت باز بلوچ ورنا، تیوک ءَ نودربران ءَ نہ تیوک ءَ چہ کراچی ءُ پنجاب ءِ جتائیں جاھاں آوار جتگ ءُ بیگواہ کُرتگ اَنت بلکیں گوادر، کیچ، ھزدار ءَ ھوار ءَ چہ بلوچستان ءِ کُنڈ کُنڈ ءَ بازیں کچے ءَ آوار جنگ ءُ بیگواہ کنگ بیگ ءَ اَنت۔بلوچ نودربران ءَ کراچی ءُ پنجاپ ءِ وانگجاھاں آیانی راج،پجار،زبان،گُد ءُ ربیدگ ءِ بنیاد ءَ ناھکی کنگ بیت ءُ ربیدگ ءِ بنیاد ءَ ھرکجا ناھکی کنگ بیگ ءَ اِنت۔
آئی ءَ گْوشتگ کہ گْوستگیں روچاں ڈیرہ بگٹی ءُ سوئی ءَ یک ٹوھیں لشکرکشی یے کنگ بوت ءُ بلوچانی گِس، جاہ،پس ءُ مال بمبگواری کنگ ءُ آدرہ کنگ بوت اَنت۔ باز بلوچ شھید کنگ بوت ءُ لیویز ءِ ایس ایچ او ءَ ھوار سَے درزن ءَ گیش بلوچ بَچ پہ زور آوار جنگ ءُ بیگواہ کنگ بوت۔
بلوچ سروک ءَ گْوشتگ کہ بلوچ نہ تیوک ءَ زورگِپتیں بلوچستان ءَ پاکستانی ریاست ءِ ناشرکاری ءِ دیمپان اِنت بلکیں چہ بلوچستان ءَ در تیواک ءَ پنجاب، کراچی ءُ ھمساھگیں ڈیھ اوگانستان ءُ ایران ءَ ھم پاکستانی چیریں ادرہ بلوچاں پہ کُشگ ءَ زور بیگواہ کنگ ءَ اَنت۔ 19 جولائی 2024 ءَ کماشیں بلوچ سروک استاد واھد کمبر چہ ایران ءِ شھر کرمان ءَ پاکستانی چیریں ادرھاں آوار جتگ ءُ بیگواہ کُرتگ اَت کہ انگت آئی ءِ باروا آئی ءِ کھول ءَ ھچ پیمیں سرپدی،گند ءُ نند ءِ آسراتی دیگ نہ بیتگ۔ استاد واھد کمبر ءِ آوار جنگ ءَ یک ماھے پیش مھمود لانگو چہ اوگانستان ءَ پاکستانی چیریں ادرھاں آوار جتگ ءُ بیگواہ کُرتگ اَت۔آئی ءِ کھول ءَ ھم آئی ءِ باروا ھچ سرپدی دیگ بیگ ءَ نہ اِنت۔ نوں پاکستانی ریاست ءَ زور ءُ زوراکی ھیل کُرتگ آئی ءِ زوراکی ءَ نوں پستائیت ءِ دْروشُم زُرتگ۔
رھیم بلوچ ایڈووکیٹ ءَ وتی درشان ءِ تہ ءَ گْوشتگ کہ پاکستان ءِ جاور چہ ھما ریاستاں ھم گَنتر اِنت کہ پہ آیاں ”بنانا ریپبلک“ ءِ گالبند کارمرد کنگ بیت۔ مالی نزوری، جھل ءَ بگِر داں بُرز ءَ کرپشن، ھژدیا ءِ وڑ ءَ سر چِست کُرتگیں مزھبی ناشرکاری ءُ بےربدگی ءُ ٹولی بازی چہ دزرس ءَ گیش بیگ ءَ اَنت۔ پارلیمان، سرکار، آمیدگس ءُ رسانکدر سلیں وڑے ءَ لشکر ءُ چیریں ادارھانی دست ءَ اَنت۔ سیاسی گل لشکر ءُ چیریں ادارھانی رازی بیگ ءَ ابید واکداری ءِ باروا جیڑ اِت نہ کن اَنت، پمشکا دُرسیں گل لشکر ءِ چریک جوڑ بیتگ اَنت۔ ھما وتگڑیں سیاسی گل کہ راجمستری مسام ءِ لوٹوک بیتگ اَنت ھما گل ھم بلوچ چکچینی ءَ لشکر ءِ ھمراھداری ءَ کنگ ءَ پد نوں راجمستری ءِ مانش ءَ کوچگ ءُ آئی ءِ کسارت کنگ ءَ لشکر ءِ کمکار جوڑ بیتگ اَنت۔ھرچ نیمگ ءَ پستائیت ءِ ھمپانیں تھاری ءِ تہ ءَ اَنت۔پیش ءَ پہ گچینکاری ءِ مَٹ کنگ ءَ تُرسینگ،بیھار، زر ءُ ناھکیں ووٹ کارمرد کنگ بیتگ اَت یا کہ وت گچین کنگ ءُ سرکار جوڑ کنگ بوت ءُ لوڑینگ بیتگ اِت اَنت نوں لشکر ءُ چیریں ادرہ پارلیمان ءِ باسکاں وت گچین کن اَنت، نا دوستیں باسک ءُ گلانی سوبمندی ءَ گوں بےسوبی ءَ مَٹ کن اَنت ءُ سرکار ءَ جوڑ کن اَنت۔داں ھما ھد ءَ کہ کہ وتگڑیں کانود یا بِل ءِ ھک ءَ ووٹ گرگ ءَ پارلیمان ءِ باسک یا آیانی کھول آوار جنگ بلیک میل کنگ ءُ لاچار کنگ بنت۔
آئی ءَ گْوشتگ کہ سینیٹر نسیمہ اھسان گْوستگیں روچ ءَ سینیٹ ءِ دیوان ءَ ھنچوش کہ پہ نادلکشی وتی بےوسی ءُ وتی سر ءَ بیتگیں زور داتگیں گپاں درشان کنگ ءَ اَت ءُ آئی ءِ گل آئی ءِ لوگ ءِ اَنگِر کنگ ءُ زھگ ءِ آوار جنگ ءِ گپ ءَ کنگ ءَ اَت چہ ایشی ءَ ھمے زانگ بیت کہ زورگِپتیں بلوچستان ءَ لس بلوچ ءِ ھواری ءَ زورگریں پاکستانی لشکر ءُ لشکری ادارہ چونیں چونیں زوراکی کن اَنت۔چوشکہ نسیمہ ءِ لوگواجہ سید اھسان شاہ زورگپتیں بلوچستان ءَ زورگریں پاکستانی لشکر ءُ چیریں ادرھانی کْوھنیں کمکارے۔ ھنچوش ھژدیا وتی زھگاں وت وارت ھمے وڑ ءَ زورگریں پاکستان ھم زورگپتیں بلوچستان ءَ کسانیں نہ منّنگے ءَ وتی کمکار ءُ آسراتی دیوکاں رُزوا کنگ ءَ اِنت چے ءَ کہ پہ کالونائزر ءَ زورگپتیں دمگ ءِ زمین، جنگی رپکارنی بستار ءُ مڈیاں بستار بیت،اود ءِ جھمنندانی ھچ بستار نہ بیت،پُرارزیشت ءُ گوں زمانگ ءِ گاماں ھم آھنگیں دیمروئی ءَ پاکستان ءِ زورگری ءَ چہ آجوئی ءَ ابید دگہ ھچ راہ نیست۔
