آواران: زور بیگواھیں بلوچ نودربر سروک شبیر ءِ گھار سیما وتی شنگ کرتگیں تامربندے ءَ گوشتگ کہ چہ آواران ءَ دلجان ءَ پاکستانی لشکر ءَ پنچ ماہ اِنت زور بیگواہ کرتگ داں انوں آئی ھچ وڑیں ھال نیست کج ءَ اِنت۔ گوستگیں سے روچ اِنت دلجان ءِ کھول آواران دمگدار ءِ کارگس ءِ دیم ءَ پہ آئی آجوئی ءَ زھرشانی نندانک ءَ نشتگ اَنت۔
آئی ءَ گوشتگ کہ باید اِنت آواران ءِ درسیں مھلوک دلجان ءِ کھول ءِ ھمراھداری ءَ بہ کن اَنت۔ مرچی دلجان ءِ کھول اِنت باندا دگرے بوت کنت۔ ما وتی باریگ ءِ ودار ءَ مکن ایں درس پاد بیا ایں ءُ یکجاہ ءُ ھمتوار بہ بہ ایں۔
سیما ءَ گوشتگ کہ من چہ آواران ءِ درسیں مھلوک ءَ دزبندی کن آں کہ دلجان ءِ کھول ءِ ھمراھداری ءَ بہ کن اَنت۔ آیاں ءَ تیوک ءَ یل مہ کن اَنت۔ اے زوراکی ءِ آس روک بوتگ چوش مہ بیت مارا ءُ شمارا درسان ءَ بہ سوچ ایت ءُ ببارت۔ بیا اِت اے زوراکیانی دیم ءَ چو کوہ ءَ مک بہ ایں ءُ ھمتوار ءُ یکمشت بہ ایں۔
