شال: بیگواھیں بلوچانی توار ( وی بی ایم پی )ءِ شدکشیں زھرشانی گدا ن ءَ 5579 روچ سرجم بوتگ۔ سے شمبے ءِ روچ ءَ چہ ھاران ءَ سیاسی ءُ چارگردی کارکن اللہ بکش، نزیر اھمد،داد مھمد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
وی بی ویم پی ءِ کمک سرکماش ماما کدیر گوں مردماں تران کرتگ ءُ گوشتگ کہ بلو چ پہ وتی راجی پدریچ ءُ وشھالیں باندات ءَزورگریں ریاست ءِ گون ءَ دیم پہ دیمی کنگ ءَ اِنت۔ بلوچ ورنا سیاسی باسکاں گوں وتی نہ ترسی ءُ سوبمندیں شونداتانی سوب ءَ زورگریں ریاست پاکستان پروش داتگ۔ آپہ وتی زورگپتی ءِ برجاہ دارگ ءَ نہ تیوک ءَ گوں لشکری زور ءِ ھواری ءَ جیٹ ءُ جنگی بالگرداں بلوچ آبادیانی سر ءَ ارش کنگ ءَ اَنت بلکیں ھمک جاہ ءَ چہ وتی دلاراں کشندہ ٹولی جوڑ کرتگ ءُ آیانی دست ءَ ھزارانی کچ ءَ بلوچ آوار جنگ ءُشھید کنگ بوتگ اَنت۔
آئی ءَ گوشتگ کہ ھمے شیرانی رتکگیں ھونانی سوب ءَ مرچی سرجمیں جھان ءَ بلوچ ءِ توار سر بوتگ ءُ مرچی نہ تیوک ءَ میان استمانی رسانکدر بلکیں امریکہ ءِ ایوانانی تہ ءَ بلوچستان ءِ نزوریانی آہ سر بوتگ اَنت۔
ماما کدیر گوشتگ کہ اے جاوراں سرجمیں جھان پاکستان ءِ چہ ناشرکاری کاروائیاں بیزار بوتگ ءُ چہ زورگریں ریاست پاکستان ءَ سرجمیں جھان بلوچستان ءِ پدریچ بلوچ راجی زرمبشت ءِ پلہ مرزی ءِ کنگ ءَ اِنت ءُ آ بلوچ ورنایاں جنگ ءِ پڑ ا گند ایت ءُ ترس آماچ اِنت۔
