شال: زور بیگواھیں زھیر اھمد ءِ کھول ءِ نیمگ ءَ پہ آئی یل نہ کنگ ءِ بگیری ءَ روانکے کشگ ءُ شال پریس کلب ءِ دیم ءَ زھرشانی کنگ بوتگ۔ زھرشانی ءَ مردماں بازیں کچے ءَ بھر زرتگ۔ زھرشانی ءَ ھواریں مردماں زور بیگواھیں مردمانی اکس گوں بوتگ اَنت ءُ پہ آیانی آجوئی ءَ لوٹ اِش کرتگ۔
زھرشانی ءَ زوربیگواھیں زھیر اھمد ءِ کھول ءَ تران کرتگ ءُ گوشتگ کہ زھیر اھمد ء ڈاکٹر ھاجی ابد اللہ یک سرکاری نوکرےگوستگیں پانزہ سال اِنت کہ پاکستان پوسٹ آپس ءَ کلرک ءِ بستار ءَ کار کنگ ءَ بوتگ۔ آ 27 جون ءَ نیمروچ ءِ دو ءَ چہ وتی کارگس ءَ موکل کرتگ ءُ جی پی او شال ءَ زرگون دگ ءَ وتی گس ءَ کلی بنگلزھی سریاب دگ ءَ روگ ءَ بوتگ کہ چہ گس ءَ سر بوگ ءَ پیش روچ ء رھمان ءَ بیگواہ کنگ بوتگ۔
آئی ءَ گوشتگ کہ زھیر اھمد سرکاری نوکرے ءَ ابید آئی ءَ گوں ھچ وڑیں سیاسی چست ءُ ایراں کار نہ بوتگ، کھول ءُ ھونی سیادیانی بنیاد ءَ زھیر اھمد ءَ ھوار آدگہ سیاد وھد وھد ءِ سر ءَ ترسینگ بوگ ءُ گساں بیڑ برگ ءَ اَنت۔
کھول ءَ گوشتگ کہ زھیر اھمد ءَ پاکستانی لشکر، سی ٹی ڈی ءُ چیریں ادارھانی کارمنداں چہ شال ءَ بیگواہ کرتگ اے باروا ما پریس کانپریس کرتگ ءُ آئی آجوئی ءِ لوٹ کرتگ، چہ زھیر اھمد ءِ یل نہ کنگ ءِ سوب ءَ ما لاچار بوتگ ایں ءُ زھرشانی کنگ ءَ ایں۔
آئی ءِ گوشتگ کہ چہ ایشی پیش ھم ما داں ھپتگاں ریڈ زون ءَ زھرشانی ءَ نشتگ ایں مئے گون ءَ زوراکی کنگ بوتگ ما پد ءَ ھم وتی نندانک برجاہ داشتگ۔ رند ءَ چہ وکدارءِ دلجمی دیگ ءَ زھرشانی نندانک ھلاس کنگ بوتگ، چہ ایشی پد ھم زھیر اھمد آجو کنگ نہ بوتگ۔
