بلوچ راجی زرمبشت ( بی این ایم ) ءِ بنجاھی کارگشاد دل مراد ءَ ماں چاگردی رسانکدر ایکس ءَ نبشتگ کہ مذھب ءِ نام ءِ سر ءَ یا مذب ءِ تہ ءَ بوتگیں کوش ءِ ارزی مردم ( کشندہ) ءِ بگیری ءَ نہ بلکیں ریاست ءِ بگیری ءَ گوستانک ءِ آمیدگس ءَ جم کنگ لوٹ ایت۔ یک مردمے ( کشندہ ) کدی ھم اے کارپد ءِ زمہ وار نہ اِنت۔
آئی ءَ گوشتگ کہ گوستانک ءُ وتی وتی زرمبشتانی آمیدگس ءَ بلوچ، پشتوناں ھوار درسیں ایردستیں راجاں وتی لوٹانی پارست ءَ جوانیں کردے پیلو کنگ لوٹ ایت۔ کشندہ وت ھچ ئے نہ اِنت، آئی نام، پجار، چاگردی ءُ سیاسی پژدر چون ھم بہ بیت بزاں آئی اے مارشت ھم نیست کہ اے وڑ چی ءَ کرتگ ئِے؟
دل مراد ءَ گوشتگ کہ مستریں میاربار پاکستان ءِ نوک آبادکاریں نزام اِنت کہ پہ وتی پدریچ ءَ کینگ ءُ دوری ودی کنگ چاگرد ءِ تہ ءَ مردم ءَ ابید نادرسیں کشندہ ودی کنگ ءَ اَنت۔ اے نادرسیں ( کشندہ) ءِ چہ پشت ءَ تچگ ءَ ما راستیں جیڑہ ءَ زانگ ءَ نہ ایں۔
