بلوچستان آجوئی سنگر ( بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ تربت،جاؤ،تمپ ءُ مشکے ءَ دژمنیں لشکر ءِ سر ءَ پنچ اُرشاں ھپت کارمند کُشتگ ءُ باز ٹپی بیتگ ءُ لشکر ءَ مالی تاوان داتگ۔
آئی گوشتگ کہ سرمچاراں سیزدہ ءُ چاردہ اگست ءِ شپ ءِ دہ ءَ کیچ ءِ بنجاھی شھر تربت ءَ لشکر ءِ پانگس ءُ گاڑیانی سر ءَ یکیں وھد ءَ اُرش کُرتگ۔ اُرش ءَ دو کارمند مُرتگ ءُ سے ٹپی بیتگ۔
جارکش ءَ گوشتگ کہ سرمچاراں تربت بالی پَٹ چاراہ ءَ لشکر ءِ پانگس ءُ آئی ءِ دیم ءَ اوشتوک بیتگیں چار گاڑیانی سر ءَ گوں وتکار ءُ ٹوھیں سلاھاں اُرش کُرتگ۔لشکر ءِ گاڑی چاردہ اگست ءِ درگت ءَ پہ راہ ءِ بند کنگ ءَ اوشتوک بیتگ اَنت۔
آئی ءَ گوشتگ کہ آواران ءِ ھند جاؤ ءَ داروکوچگ ءِ کوہ ءِ سر ءَ برجاھیں پاکستانی لشکر ءِ پانگس ءِ سر ءَ سرمچاراں چاردہ اگست ءِ بیگاہ ءِ ھپت ءَ پیسر ءَ گوں اسنائپر توپک ءَ نشانگ کُرتگ ءُ یک کارمندے کُشتگ ءُ پد ءَ گوں راکٹ ءُ نوکیں سلاھاں اُرش کُرتگ کہ اے اُرش ءَ لشکر ءِ دگہ یک کارمندے مُرتگ ءُ باز ٹپی بیتگ۔سرمچاراں دژمن ءِ یک ڈرون کیمرھے ھم نشانگ کُرتگ۔
جارکش ءَ گوشتگ کہ تمپ ءِ میتگ کلاھو ءَ 14 اگست ءِ شپ ءِ نوہ ءَ زورگریں لشکر ءِ پانگس ءِ سر ءَ گوں نوکین ءُ ٹوھیں سلاھاں اُرش کُرتگ، اُرش ءَ دژمنیں لشکر ءَ جانی ءُ مالی تاوان داتگ۔
آئی ءَ گوشتگ کہ سرمچاراں سیزدہ اگست ءِ شپ ءِ نوہ ءَ مشکے گورکائی کرکس ءَ برجاھیں زورگریں پاکستانی لشکر ءِ پانگس ءِ سر ءَ گوں ٹوھیں سلاھاں اُرش کُرتگ۔ اے اُرش ءَ دژمن ءِ یک کارمندے مُرتگ۔
جارکش ءَ گوشتگ کہ دگہ یک اُرشے ءَ سرمچاراں سیزدہ اگست ءِ شپ ءِ نوہ ءَ مشکے جیبری ءَ برجاھیں دژمنیں پاکستانی لشکر ءِ بنجل ءِ سر ءَ گوں نوکین ءُ ٹوھیں سلاھاں اُرش کُرتگ۔ اُرش ءَ دژمنیں لشکر ءِ دو کارمند مُرتگ ءُ سَے ٹپی بیتگ ءُ بنجل ءَ اوشتاتگیں دژمن ءِ گاڑیاں ھم تاوان بیتگ۔
آئی ءَ گوشتگ کہ بلوچ راج ءَ گوں سرمچارانی ھواری ءَ دژمن ءِ وتگڑیں آجوئی ءِ شاتکامی روچ بے سوب کُرتگ۔زورگریں پاکستان ءِ وتگڑیں آجوئی ءِ روچ چاردہ اگست رَد کنگ ءَ اے گپ تچک کُرتگ کہ نوں دژمن ءُ دژمن ءِ کمکاراں بلوچ سرڈگار ءَ ھچ جاہ نیست۔مرچی بلوچ راج چہ دژمن ءَ آئی ءِ دُرسیں میارباریانی بیر ءِ گرگ ءَ جاڑی اِنت۔
میجر گھرام ءَ اُشانی زمہ واری منّ اِتگ ءُ گوشتگ کہ داں زورگِپتیں بلوچستان ءِ آجوئی ءَ زورگریں لشکر ءِ سر ءَ اُرش برجاہ بنت۔
