بلوچ راجی زرمبشت ( بی این ایم ) ءِ سرکماش ڈاکٹر نسیم ءَ گوشتگ کہ پاکستانی لشکر ءِ دست ءَ زور بیگواہ کنگ بوتگیں مردمانی کھولانی پنجاہ لک زر ءِ پیش کنگ تچکی ءَ میارباری ءِ من اِتگ۔ ریاست اے گپ ءَ منگ ءَ نہ اِنت کہ زور بیگواھیں مردم لشکر ءِ زنداناں بندیگ اَنت، بلکیں یکشل ءَ ھمے ٹاپار ءَ جنگ ءَ اِنت کہ زور بیگواھیں مردم کوھاں شتگ اَنت ءُ ریاست ءِ بگیری ءَ مڑگ ءَ اَنت۔ نوں ھمے جست ودی بیت کہ ریاست کجام گپ، کانود یا نیمون ءِ پارست ءَ زوربیگواھیں مردمانی کھولانی پنجاہ لک ءِ وڑیں زر دیگ ءِ سوڑگ ءَ کنگ ءَ اِنت۔
آئی ءَ گوشتگ کہ راستی ھمیش اِنت کہ پاکستان ریاست ءَ بلو چ راجی زرمبشت ءِ گون ءَ دیم پہ دیمی کنگ ءَ نہ تیوک ءَ دودمانی پروش وارتگ، بلکیں چہ مردمانی یکشلیں گھگیری ءَ ریاست ءِ کینگداری ءَ سریچیں پیشیگیں دروگیں گپ زِر ءَ چگل داتگ اَنت۔
ڈاکٹر نسیم ءَ گوشتگ کہ چہ پاکستان ریاست ءِ بے سریں دروگاں ھمے پدر اِنت ریاست ءِ سروک ( شھباز شریپ) گوش ایت کہ زور بیگواھیں مردمانی باروا توانمندیں بھرگ ( پاکستانی لشکر ) ءِ گون ءَ گپ کن آں۔ پارٹی ءِ واکداری ءِ دومی سروک ءُ پیشیگیں مزن وزیر نواز شریپ ءِ جنک بی بی مریم نواز وھدے کہ اپوزیشن ءَ اَت گڑا زور بیگواھیں مردمانی زھرشانی نندانکاں با زبراں ھمے گوشتگ کہ بلوچ ورنایاں ریاستی لشکر بیگواہ کنگ ءَ اِنت۔ چہ ایشی ابید پاکستانی لشکر ءِڈی جی آئی ایس پی آر آسپ گپور گوشتگ کہ ما گوں وشیں دل ءَ مردماں بیگواہ نہ کن ایں بلکیں جنگ ءِ میان ءَ درس کنگ لوٹ اَنت۔ دومی نیمگ ءَپاکستانی لشکر ءِ ھواری ءَ سرکاری سروک، بلوچستان ءِ وتگڑیں سرکار ءِ سروک تھی کارانی وزیر ءَ ھوار آدگہ وزیر ءُ لشکر ءُ کمکار مدام ھمے ٹاپار ءَ جنگ ءَ اَنت کہ بلوچستان ءَ ھچ وڑیں مردم زور بیگواہ نہ اِنت۔ آیانی رد ءَ اے مردم اوگانستان، یورپ ءَ شتگ اَنت یا کوہ ءَ اَنت ءُ ریاست ءِ بگیری ءَ جنگ کنگ ءَ اَنت آیانی نام ءِ سر ءَ کھول دروگ بندگ ءُ ریاستءِ بگیری ءَ پندل سازگ ءَ اَنت۔ پاکستان ءِ دژمنانی دست ءَ لیبوک اَنت، بلوچستان ءِ دیمروئی ءَ نہ لوٹ اَنت۔
ڈاکٹر نسیم ءَ گوشتگ کہ پاکستانی لشکر ءِ دست ءَ زور بیگواہ کنگ بوتگیں مردم پاکستانی ریاست ءِ پیشانی ءِ داگ اَنت۔ پہ ایشی دور کنگ ءِ جھد ءَ ریاست گیشتر وت ءَ رزوا کنگ ءَاِنت۔ بلوچ زور بیگواھیں مردمانی جیڑہ تیوک ءَ بلوچستانءَ نہ بلکیں میان استمان ءَ جسکگ ءَ اِنت۔ رز ءِ پیش کنگ ءَ ریاست ھزارانی کچ ءَ مات ءُ گھارانی ارمان، دراجکش ءُ آزاردھیں ودار، راھچاریں چمانی نھاد ءَ جت نہ کنت۔
پاکستان ریاست ءَ دیوالانی سر ءَ نبشتگیں وانگ لوٹ اَنت۔ ما بلوچ چہ پاکستان ءَ ھچ وڑیں رھم ءِ لوٹ ءَ نہ کن ایں۔ ھچ وڑیں لبے ءِ لوٹوک نہ ایں۔ ما گوں میان استمان ءَ لوٹ کن ایں آ پاکستان ءَ میان استمانی جنگی کانودانی شرپ ءُ کار کنگ ءِ سر ءَ زور بہ دنت۔
آئی ءَ گوشتگ کہ سوب بلوچ راج ءِ نسیب ءَ اِنت۔ ھما ریاست ءَ کہ وتی راھبند ءُ کانود ءِ سر ءَ بیسہ نہ بوتگ آئی گڈی آسر گوستانک ءَ گچیں کرتگ۔ پاکستان ھمے داب ءَ جنزگءَ اِنت ءُ بلوچ راجی زور ءِ دیم ءَ پروش دژمن ءِ نسیب ءَ بوتگ۔
