آواران: زورگریں پاکستانی لشکر ءَ بیڑ برتگ ءُ ورنایے آوار جنگ ءَ پد بیگواہ کرتگ۔
اھوالکار ءِ رد ءَ زور بیگواہ کنگ بوتگیں ورنا ءِ نام لیاکت ء ڈاکٹر شھداد اِنت کہ کولواہ ءِ میتگ بزداد ءِ جاہ منند اِنت۔ زورگریں پاکستانی لشکر ءُ چیریں ادارھانی کارمنداں 14 جولائی 2024 ءَ آئی گس ءَ بیڑ برتگ ءُ آوار جتگ۔ زور بیگواھیں لیاکت یکبرے 2021 ءَ ھم آوار جنگ ءُ بیگواہ کنگ بوتگ ءُ چہ بازیں آزاراں پد یل کنگ بوتگ۔
زور بیگواھیں لیاکت ءِ پت ڈاکٹر شھداد ءَ پاکستانی لشکر ءَ اگست 2016 ءَ آوار جتگ ءُ بیگواہ کرتگ، سے چار روچانی تہ ءَ آواران دراسکی کور ءَ دروگیں میڑے ءَ کشتگ ءُ آئی ءِ لاش چگل داتگ۔
لیاکت ءِ زوریں بیگواھی ءِ گپ بلوچ راجی زرمبشت ( بی این ایم ) ءِ مردمی ھکانی ادارہ پانک ءَ ماں رسانکدری تندجاہ ایکس ءَ راست کرتگ ءُ آئی آجوئی ءِ لوٹ کرتگ۔
