دشت: نگور لبزانکی مجلس بل نگور ، رداپ لبزانکی مجلس پیروتگ ءُ نگور اکیڈمی بل نگور ءِ چیر دستی ءَ نمیرانیں برکت بل والا ءِ یاتگیری آئید ءِ سیمی روچ ءَ نوزدہ جون ءَ ماں بل نگور ءَ مَراگشے برجم دارگ بوتگ۔ دُرستاں ساری میوزک پروموٹر سوسائیٹی ءَ نمیرانیں بَرکت بل والا ءِ نام ءَ زیمر تاک کِتاب چاپ ءُ شِنگ کرتگ ءُ ھمے مراگش ءَ آئی ءِ دیمدرائی بوتگ ۔
اے مراگش ءِ سے بھرانی تہ ءَ بوتگ۔ اولی بھر ءَ نمیرانیں برکت بل والا ءِ زند ءُ ازم ءِ بابت ءَ گشانک دیگ بوت کہ ایشی ءِ تہ ءَ ھلیل یار ، بالاچ کادر ، زُلپکار نگوری ، سابدہ بَرکت ءُ اسھاک رھیم ءَ تران کرتگ، اے بھر ءِ جار چین زر ھان داد بوتگ ءُ گچینی مھمان اسھاک رھیم بوتگ۔
دومی بھر شائری بوتگ اے بھر ءِ گچینی مھمان شرپ شاد بوتگ ءُ جار چین ءِ ڈبہ نسار یوسپ ءُ شاہ ابن شین ءَ بوتگ اَنت، اے بھر ءَ باز شائراں وتی شئر ونتگ اَنت ءُ چہ دیوان ءَ داد گپتگ ، اشانی تہ ءَارشد ابرار ، مجید ساھر ،سابر کیپ ، اشرپ اومان ، اسماھیل داود ، ایوب مُراد ، رھیم ھمراز ، ھیر مھمد جلال ،یار جان ھوتی پیرداد پراز ، ، شے چراگ ، بشیر بشارت ، بیزن مُراد ، راشد شکست ، چاکر سگیر، ھمزہ اباس ، ھپیز شاکر , پزل شوھاز ، ابدالرھمان ، آزر مُراد ، گپور اباس ، زاھد آبد ، آرپ ازیز ، زُلپکار نگوری، ھمل امین دشتی ، ندیم اکرم ، شرف شاد ءُ بَرکت الی سجّاد ءُ دگہ بازیں شاعرے ءَ بھر زرتگ۔
سیمی بھر ساز و زیملی دیوان بوتگ اے بھر ءِ جار چین اسھاک اسد بوتگ، گُشندھانی تہ ءَ سامِر بَرکت ، سیلمہ بَرکت ، ساجد بَرکت، نز یر ناز ، مکسود بلوچ ،ھُسین بھرام ، سابر پدا ، پراز شاہ ، بیبگر اھمد انور رھیم ءُ ازگر آدینہ ءَ وتی ازم ءِ درانگازی کرتگ ءُ بینجو نواز اُستاد داد اللّہ بوتگ۔
