بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹردین مھمد ءِ جنک سمی دین ءَ ماں چاگردی رسانکدر ءِ تندجاہ ایکس ءَ نبشتگ کہ من درسیں شرپمندیں دوستانی منت ءَ گراں کہ آ مدام منی گون ءَ اوشتاتگ اَنت ءُ وتی نیکیں واھگ اِش پیش داشتگ اَنت۔ من اے درگت ءَ وت ءَ وش بھتے لیک آں کہ منی مردم منی گون ءَ اوشتاتگ اَنتءُ ھمک گام ءَ گرانیں جاوراں منی گون ءَ ھمراہ اَنت۔ ھما آزیز ءُ ھمبلانی منتواراں کہ آیاں من ءَ دلبڈی داتگ۔
سمی دین ءَ گوشتگ کہ اے سپر ارزان نہ اِنت انچو الم اش کرتگ ءُ ونتگ کہ ھمک تھاریں شپ ءَ پد یک سھبے ودی بیت ءُ ما درس ھما وھد ءِ ودارءَ کن ایں کہ اے انچیں چاگردے ءِ اود ءَ مردمی ھک لگتمال کنگ مہ بنت۔ کسے ءِ سر زوراکیانی دیم ءَ جھل مہ بیت، کسے پہ بنکی ھکاں جنگ مہ کنت۔ اے وڑیں چاگردے ءِ جوڑ کنگ مئے شمئے درسانی زمہ واری اِنت ءُ اے زمہ واری ءَ ما جھد ءَ پیلو کن ایں۔
آئی ءَ گوشتگ کہ من یکبرے پدا شمئے درسانی منت ءَ گران ءُ ھمے اوست ءَ داراں مردمی ھکانی لگتمالی پاکستان ءَ ھوار جھان ءِ کجام ھم کنڈ ءَ بوت پہ آیاں ما را درساں توار چست کنگی اِنت۔
