بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ ماشکیل ویل ءِ پژدر ءَ نبشتگ کہ بلوچستان ءِ ھمک نیمگ ءَ ھونریچی اِنت، ھمک نیمگ ءَ لاش، پرس ءُ یک نہ کٹوکیں دردے۔
آئی ءَ گوشتگ کہ زی ماشکیل سیمسر ءَ ایرانی لشکر ءَ بلوچ ڈرائیورانی سر ءَ تیرگواری کرتگ چہ ایشی ءَ سے بلوچ ڈرائیور ازگر ساسولی ء مھمد اکبر ساسولی، شکر اللہ ء کادربکش مھمد ھسنی، ابدالواسہ ء سلیمان ریکی شھید ءُ شش مردم ٹپی ءُ دو مردم دزگیر بوتگ، یک لاشے ھم گوں وت برتگ۔
ڈاکٹر ماہ رنگ ءَ گوشتگ کہ سیمسر ءِ اے نیمگ ءَ بلوچ ڈرائیور پاکستانی لشکر ءِ نیمگ ءَ یکشل ءَ آزارانی دیمپان اَنت ءُ سیمسر ءِ دومی نیمگ ءَ ایرانی لشکر ءِ زوراکیاں مئے مردمانی زندماں جنجال کرتگ۔
آئی ءَ گوشتگ کہ بلوچ راج اے وھد وت ماں وت گرءُ چیل ءِ نہ اِنت راجی یکجاھی ءُ یکمشتی اِنت۔ اے وھد ءَ ما یک ترسناکیں چکچینینی ءِ دیم پہ دیمی ءَ کنگ ءَ ایں۔ چہ ماشکیل ءَ بگر داں تربت ءَ مرچی مئے ھمک گس پرسیگ اِنت۔ ھمک گس ءَ تیوک ءَ لاش ایر اِنت۔ اگاں مرچی ما وتی لڑانی تہ ءَ یکجاھی ءُ یکشمتی ءِ ودی کنگ ءَ بے سوب بوت ایں گڑا مئے آھوکیں پدریچ مارا نہ بکش ایت ءُ مئے دژمن مئے چکچینی ءَ تیز کنت۔ ھدا پچار اِت پہ اے کودکیں لاشاں تیوک ءَ اے بلوچ چکچینی ءِ بگیری ءَ وتی میان ءَ یکجاھی ودی بہ کن اِت۔
