پنجگور: گوستگیں روچاں وندر ءَ دگ ویل ءَ بیران بوتگیں نودربر شھاب شمبے زھی ءِ کھول ءَ وتی شنگ کرتگیں درشانے ءَ گوشتگ کہ بی ایل اے ءِ جارکش آزاد ءِ نیمگ ءَ مئے کھول ءِ چم ء چراگ وندر ءَ دگ ویل ءَ شھید بوتگیں نودربر شھید شھاب رھیم شمبے زھی ءَ وتی سرمچار لیکگ ءَ گوں ترندیں دانکاں رد کن ایں ءُ ایر جن ایں۔
آئی ءَ گوشتگ کہ اے گل ءَ لھتیں ماہ پیش مئے کھول ءِ پکنک ءَ شتگیں مردمانی سر ءَ اُرش کرتگ شھید شھاب رھیم ءِ مستریں برات تاج رھیم ٹپی ءُ ناکو زتک ابداللہ شمبے زھی شھید کرتگ ءُ دروگ ءُ وتسریں درشانے ءَ ردی منّ اتگ ءُ پھلی لوٹ اِتگ، بلے ما اے دروگیں پھلی رد کرتگ ءُ شھید ابداللہ ءِ بے میاریں کوش ءِ پٹ ءُ پول ءُ انساپ ءِ لوٹ کرتگ۔
آئی ءَ گوشتگ کہ ابداللہ شمبے زھی ءِ بے میاریں کوش ءَ اے گل ءَ مردمانی سکائیں ڈوبارگ ءُ ملامتی ءِ دیمپان بوتگ، گل ءَ لوٹ ایت کہ شر ءُ جوانیں وڑے ءَ پٹ ءُ پول بہ کنت مئے گون ءَ انساپ بہ کنت بلے آئی چہ وتی ملامتی ءِ چیر دیگ ءُ مئے کھول ءِ سسائی آزار دیگ ءَ دروگ بستگ ءُ دگ ویل ءَ شھید بوتگیں شھاب رھیم ءَ وتی سرمچار لیک اتگ ءُ چہ ما بیرے گرگ ءِ جھد ءَ اِنت۔
آئی گوشتگ کہ ما ایشی گیشینگ ءَ ھژدری سرپد بہ ایں کہ شھاب رھیم گوں ھچ وڑیں گل ءَ ھوار نہ بوتگ، آ وتی کھول ءِ گپ زوروک ءُ مھروانیں مردمے بوتگ۔ آئی درسیں سرگرمی گو وتی گس، کھول ءُ وانگ ءَ بندوک بوتگ اَنت۔ چہ مئے بدبھتی ءَ آ گوں وتی کھول ءِ دگہ پنچ مردمانی ھواری ءَ دگ ویلے ءَ اچما گستا بوتگ اَنت۔ وت ءَ راجی گلے گوشگ ءُ مئے ٹپانی سر ءَ واد پریچگ ءُ وتی سیاسی باپاری ءِ سمبھینگ ءِ درچ ءَ بند بہ کن اِت۔
