بلوچ راجی زرمبشت ( بی این ایم ) ءِ جارکش ءَ وتی درشانے ءَ گوشتگ کہ 9 اپریل بلوچ راجی گوستانک ءِ یک سیاھیں روچے ، اے روچ ءَ پاکستان ءَ پُرمڑائیں راجدوست ءُ بی این ایم ءِ بانی سرکماش واجہ گلام مھمد ءُ آئی ھمراہ لالا منیر ءُ شیر مھمد مرگاپ ءَ شھید کرتگ بلوچ راج چہ یک بے جوڑھیں راھشون، زانوگر، شائر، جپاکش ءُ سربلندیں سرے ءَ زبھر کرت۔
آئی ءَ گوشتگ کہ نو اپریل ءَ درسیں چیپٹر، ھنکین ءُ سیلز پہ چیئرمین ءِ یاد ءُ زانشت ءَ نیاد برجم بہ دار اَنت ءُ وتی پرمڑائیں راھشون ءَ ستک شانی ندر بہ کن اَنت ءُ آئی زانشت ءِ رژنائی ءَ نوکیں جیڑہ ءُ جنجالانی دیمپانی ءَ سرپدی بہ زور اَنت۔
جارکش ءَ گوشتگ کہ چیئرمین گلام مھمد ءَ گوں وتی راجدوستی لیکہ ءُ مھکمیں ارادہ ءَ بلوچ راجی زرمبشت یک جوانیں جاھے ءَ سر کرتگ۔ اے آئی زانشت ءِ برورد اِنت کہ دژمن چہ وتی درسیں زوراکی، چکچینی، مچی سزا ءَ ابید بلوچ ءِ چہ زرمبشت ءَ دزکش کنگ ءَ بے سوب بوتگ۔ بلکیں ھمک وھد ءَ زرمبشت ءِ تہ ءَ یک نوکیں زورے گندگ بوگ ءَ اِنت، زندمان ءِ ھمک بھرگاں سیادی داروکیں مردم دیمونی ءِ لیکہ ءِ سرءَ کار ءَ اَنت اے زرمبشت ءِ سوبمندی اِنت۔
آئی گوشتگ کہ چیئرمین گلام مھمد ءِ کول ءُ مُھکمی گرانیں وھداں مارا نزور بوگ ءَ نیل اَنت، تھاریں راھاں پما رژنا کن اَنت۔ اے شھید چیئرمین ءِ سکین ءِ برود اِنت کہ بلوچ راج ءِ سر ءَ پاکستان ءِ ایردستی، زوراکی، پدمنتگی ءُ نازانتی سر ءَ داتگ، پہ راجی تباھی ءَ درسیں باپاری، لٹ ءُ پل سر ءَ داتگ اَنت بلے گلام مھمد ءَ ایردستی ءِ تھارونکیانی تہ ءَ راہ گار کرتگیں راج ءَ را یک نوکیں ھاٹیگے داتگ ءُ مرچی بلوچ ایردستی ءِ مارشت ءَ ھما کچ ءَ سرپد اِنت کہ جھان ءِ ھچ وڑیں لب، زوراکی ءُ مچی سزا ایردستی ءِ مارشت ءُ آجوئی ءِ جوزگ ءَ ھلاس کرت نہ کنت۔
جارکش ءَ گوشتگ کہ بیا اِت وتی بے جوڑھیں راھشون ءَ ستک شانی ندر بہ کن اِت، پہ آجوئی زرمبشت ءَ وتی کرد ءِ مھکم کنگ ءَ شھید چیئرمین ءِ درونتاں ھیل بگر اِت۔ گلام مھمد تیوک ءَ پارٹی نہ بلکیں سرجمیں بلوچ راج ءِ راھشون بوتگ۔ پمیشکا وتی راھشون ءَ پارٹی ءِ ھواری ءَ یات بہ کن اِت ءُ رسانکدر ءَ اے #MartirsOpMurgaap تکشام ءَ شریں وڑے ءَ بھر بزور اِت۔
