شال: پہ زور بیگواھیں مردمانی پد جنگ ءَ وی بی ایم پی ءِ زھرشانی گدان ءَ 5356 روچ سرجم بوتگ کہ انگت ءَ برجاہ اِنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر چہ زھرشانی گدان ءَ تامربندے شنگ کرتگ ءُ گوشتگ کہ من یک پوسٹرے دیستگ 13 مارچ ءَ جنیوا ءِ بروکن چئیر ءِ جھل ءَ یک دیوانے برجم دارگ بوگ ءَ اِنت، اود ءَ آدگہ گلانی ھواری ءَ وی بی ایم پی ءِ نام نبشتہ اِنت ءُ مونوگرام جنگ بوتگ، من اے گپ ءَ تچک کنگ لوٹاں کہ وی بی ایم پی ءَ گوں ایشی ھچ وڑیں ھمگرنچی نیست ءُ چہ وی بی ایم ءِ نام ءِ کارمرز کنگ ءَ وت ءَ گستا بدار اَنت۔
آئی ءَ گوشتگ کہ وی بی ایم پی ءَ ڈیھ ءُ درانڈیھ ءَ ھچ وڑیں گلانی گون ءَ ھچ پیمیں ھم سنتی نیست، دری ڈیھانی گل وتی دیواناں وی بی ایم پی ءِ نام ءُ مونوگرام ءِ کارمرز کنگ ءَ وت ءَ گستا بدار اَنت اگاں نہ گڑا مارا کانود ءِ پارست ءَ ھک ھست۔ وی بی ایم پی بلوچستان ءَ گوستگیں سیزدہ سال اِنت کہ زور بیگواھیں مردمانی آجوئی ءَ یکشل ءَ جھد کنگ ءَ اِنت ءُ بلوچ شھیدانی سیادی ءَ کنت کہ آیاں پاکستان ریاست درکانودی کشگ ءُ لاشاں جنگلاں چگل دیگ ءَ اِنت۔
ماما کدیر گوشتگ کہ ما اے گپ ءَ تچک کنگ لوٹ ایں وی بی ایم پی تیوک ءَ پہ بلوچستان ءَ مردمی ھکاں کارکنوکیں گلے۔ ڈنی ڈیھاں اگاں مارا لوٹ اِتگ یا بہ لوٹ اَنت مئے گل ءِ زمہ وار گل ءِ جھگیری ءَ کن اَنت۔ مئے گل ءِ بنجاہ ءِ سوڑگ اِنت کہ مئے گل ءِ نام ءَ آھوکیں وھداں گرگ ءَ وت ءَ گستا بدار ایت۔
