بلوچ راجی زْرمبشت ءِ جارکش ءَ وتی درشان ءَ گْوشتگ آدینگ ءِ روچ ءَ پاکستانی زر پانک ( کوسٹ گارڈز ) ءَ ماں کنٹانی ، جیمڑی ، گوادر ءَ ’ ایسا ء بابو ‘ دریا ءَ بڈینتگ ءُ کشتگ۔کشگ بیتگیں روکپتی بلوچستان ءَ ڈمپگ دشتیاری ءِ نندوک ءُ ایرانی ڈیزل کشیں ھژوک ( کاھک ) ءَ مزدورے اَت۔
آئی ءَ گْوشتگ پہ کروڑانی باج گرگ ءَ ایرانی تیل ءِ باپار ءِ سر ءَ ناراھی کار ءِ چپس ( لیبل) جنگ بیتگ۔ راستی ایش اِنت کہ اے باپار روچ ء رامانی پاکستانی لشکر، کوسٹ گارڈز ءُ پولیس ءِ واھگ ءُ دیم پہ دیمی ءَ بیت۔بلے پد ءَ ھم گوں اے باپار ءَ بندوکیں مزدور روچے پہ نیمونے آزار دیگ بہ اَنت۔
جارکش ءَ گْوشتگ پاکستان کوسٹ گارڈز زورگریں لشکر ءِ بھر اِنت ءُ نوک آبادی واک ءِ مستی ءَ گوں بلوچاں سھرائیں رنگے ءَ کینگ دار ایت۔ایشی ءِ گوں کینگ ءُ کست ءَ بلوچ مزدور ، شھرمنند ءُ ٹرانسپورٹرانی لٹ دیگ ءِ گپ ءُ تامر مدام دیم ءَ کا اَنت۔کوسٹ گارڈز شپکی ءِ گر ءُ دار ءِ نام ءَ بلوچستان ءِ تیاب ءَ نندارینگ ءُ بلوچانی سر ءَ ڈل کنگ بیتگ بلے اے لشکر نشہ ءِ تالانی ءَ گون اِنت۔ اے پہ باج گیری ءَ پنجاپ ءِ داشتگیں رمبے کہ اد ءَ پہ لشکری سروگان ءُ پنجاپ ءَ زر مچ کنت۔
آئی ءَ گْوشتگ اے کوش ءِ زمہ وار تیوک ءَ کوسٹ گارڈز نہ اِنت بلکیں باپار ءِ نام ءَ کوسٹ گارڈز ءَ آسراتی دیوکیں ھما مردم ھم برابریں زمہ وار اَنت کہ کوسٹ گارڈز ءَ زر دے اَنت بلے چہ آیاں مزدورانی زند ءِ پھریزگ ءِ مانزمانی نہ زیر اَنت۔ما آیاں دلگوش پرینگ لوٹ ایں کہ آ وتی کردار ءَ گھتر بہ کن اَنت۔آ درامدانی وش کنگ ءُ آیانی دیم ءَ ’ جی ھو ‘ کنگ ءِ جاہ ءَ وتی راج ءِ بارہ ءَ بہ جیڑ اَنت۔
جارکش ءَ گْوشتگ مردمی اگبالانی پانک ماں بلوچستان ءَ پاکستانی لشکر ءُ گوں ایشی ءَ بندوکیں تْرامگیجانی دست ءَ مردمی اگبالانی مزنیں بگیریاں دلگوش بہ کن اَنت ءُ پہ مردمانی زندمان ءِ پھریزگ ءَ کار بہ کن اَنت۔
