بلوچستان لبریشن پرنٹ (بی ایل ایپ ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ سرمچاراں 12 نومبر ءِ شپ ءِ نھ ءُ نیم ءِ نزدیک ءَ کیچ ءِ ھند ھیرونک ءَ زورگریں پاکستانی پوج ءِ کیمپ ءِ سر ءَ اُرش کرتگ باز گرنیڈ لانچر ءِ گولا آس داتگ کہ دژمن ءِ بنجل ءِ تہ ءَ کپتگ اَنت پوج ءَ جانی ءُ مالی تاوان بوتگ۔
جارکش ءَ گوشتگ کہ سرمچاراں چیریں بھرگ ءِ ھال دیگ ءِ پژدر ءَ 11 نومبر ءَ ھاران ءِ ھند دشتکین ءَ یک چیریں کاروائی یے ءَ کشندہ ٹولی ءِ کارمند نادر ء الاھی بکش مھمد ھسنی دزگیر کرتگ۔ نادر ریاستی کمک کار ھیدر سیاہ پاد ءِ نزیکیں سنگتے بوتگ، چہ ایشی ءَ پیش نادر ءَ وتی بے میار پیش کنگ ءِ موہ دیگ بوتگ بلے آئی ھاران ءَ گوں یک پوج ءِ میجرے ءَ سنگتی کرتگ ءُ بلوچ سرمچارانی بگیری ءَ دژمنی ءِھواری ءَ لس بلوچانی دلسیاہ کنگ بندات کرتگ۔ جست ءُ پرس ءِ میان ءَ میاربار نادرءِ سر ءَ دزی ڈنگی ، نشہ ءِ باپاری ءَ ھوار جتائیں چاگردی سلکاری سرزد بوتگ اَنت۔ گل ءِ جست ءُ پرس ءِ میان ءَ نادر وتی درستیں سنگتانی نام داتگ اَنت۔
آئی ءَ گوشتگ کہ بی ایل ایپ نادر ءِ نیٹ ورک ءِ درسیں مردماں موہ دنت کہ آ گل ءِ دیم ءَ وتی بے میاری ءَ پیش بکن اَنت اگاں نا آیانی بگیریءَ دست کپتگیں منانکانی بنیاد ءَ کاروائی کنگ بیتءُ درستانی آسر نادر ءِ وڑ ءَ بیت۔نادر ءِ بگیری ءَ درسیں منانکانی راست بوگ ءَ پد آئی مرگ ءِ سزا دیگ ءِ پیسلہ کنگ بیتگ۔ سرمچاراں اے پیسلہ ءِ سر ءَ کار کرتگ ءُ 12 نومبر ءِ شپ ءَ کرم کاریز ءَ نادر ء الاھی بکش کشتگ۔
آئی گوشتگ کہ دگہ یک کاروائی یے ءَ بی ایل ایپ ءِ سرمچاراں 12 نومبر ءِ بیگاہ ءِ شش ءِ نزدیک ءَ ھزدار ءِ ھند اورناچ ءُ پنجگور ءَ شھدگ بستگ گاڑی پٹ ءُ پول کرتگ اَنت پوج ءِ کارمند ءُ چریک نہ بوتگ۔دگ بندی ءِ میان ءَ یک مزھبی ءُ ٹکی سروکے گوں وتی سلاہ ءُ پھازداراں دگ بندی ءِ جاہ ءَ سربوتگ اَنت سرمچاراں جست ءُ پرس ءُ پجار ءَ پد گوں شرپ ءَ یل داتگ۔
جارکش ءَ گوشتگ کہ مرچی سرمچاراں اورناچ ءِ بازار ءَ تر ءُ گرد کرتگ ءُ پولیس تانہ انگر کرتگ اود ءَ ھچ وڑیں سرکاری سلاہ ءُ سامان نہ بوتگ۔
جارکش ءَ گوشتگ کہ دگہ یک ارشے ءَ بی ایل ایپ ءِ سرمچاراں 10 نومبر ءِ بیگاہ ءِ پنچ ءِ نزیک ءَ کچی (ڈاڈر ) ءِ ھند میسر شاھوانی ءَ زورگریں سرکار ءِ جتگیں ٹاور گوں مشین ءُ ساماناں مانداشتگ۔
میجر گھرام بلوچ ءَ درستیں ارشانی زمہ واری من اتگ ءُ گوشتگ کہ ھمے کول ءَ کن ایں داں بلوچستان ءِ آجوئی ءَ زورگریں پوج ءُ دژمنیں توانمندانی بگیری ءَ مئے ارش برجاہ بنت۔
