بلوچ آجوئی لوٹوکیں سروک رھیم بلوچ ایڈوکیٹءَ وتی شنگ کرتگیں درشانے ءَ گوشتگ کہ بلوچستا ن ءِ شھید نواب نوروز ھان زھری، میر بٹھے ھان زھری، میر بھاول ھان زھری، میر ولی ھان زھری، میر سبزل ھان زھری، میر مستی ھان موسیانی ءُ میر گلام رسول نیچاری 1950 ءِ دھک ءَ دیمونی داتگ آیانی دیمونی زوال نہ بیتگ اَنت، بلکیں بلوچ راجی آجوئی ءِ زرمبشت آیانی دیمونیءِ بنیاد جوڑ بیتگ ءُ وھد ءُ جاورانی لوٹانی ردءَ گوں گل ءُ مھکمی ءَ گوستگ ءُ یک گھتریں دروشمے ءَ ھست اِنت۔
آئی ءَ گوشتگ کہ زورگریں ریاست ءِ جھگیراں کرآن زرتگ ءُ آیانی تاوان نہ دیگ ءِ کھولءِ سر ءَ نواب نوروز ھانءَ چہ کوہ ءَ ایر کرتگ ءُ گوں ھمبلاں دزگیر کرتگ ءُ رد داتگ ءُ وتی زبان وارتگ پہ بلوچ راج ءَ یک چم دیستیں سبکے جوڑ بیتگ ءُ چونیں ھم آجوئی لوٹوکیں سیاسی پارٹی، ٹولی یا سلاہ بندیں گل زورگریں ریاستءِ چونیں ھم کولے ءِ سر ءَ بیسہ نہ کنت۔
رھیم بلوچ ایڈوکیٹ ءَ گوشتگ کہ من مرچی نواب نوروز ھان ءِ ھمبلاں بلوچستان ءِ شھیداں آیانی شستءُ چارمی سالروچ ءِ درگت ءَ ستک شانی ندر کن آں ، آ 1961 ءَ مرچیگیں روچ ءَ سکھرءُ ھیدر آباد ءِ زندانانی تہ ءَ پاھو دیگ بیتگ اَنت۔ من بلوچستانءِ شھیدانی لاشانی چہ سکھر ءُ ھیدر آباد ءَ بے کس کنگ ءُ کبر کنگ ءِ موکل نہ داتگ ءُ آیانی لاش گوں شرپ ءَ کلات ءَ سر کنگ ءِ بابت ءَ ھدا مرزی ئیں میر رسول بکش ٹالپرءُ میر الی اھمد ٹالپر ءَ ستک شانی ندر کن آں کہ آیاں ایوبی زوراکیانی کھر ءِ پرواہ نہ کرتگ ءُ گیرتمندیں بلوچ بوگ ءِ سبوت داتگ۔
